Almaty oblysynda Almasbek Sadyrbaı men taǵy alty adamǵa qatysty qylmystyq is boıynsha tergeý aıaqtaldy. Olar asa iri kólemdegi alaıaqtyq, qylmystyq jolmen alynǵan tabysty zańdastyrý jáne uıymdasqan topqa qatysý baptary boıynsha aıyptalyp otyr, dep habarlaıdy Dalanews.kz Kaztag agenttigine silteme jasap.
Oblystyq prokýratýranyń habarlaýynsha, 20 maýsymda vedomstvoaralyq jedel-tergeý toby Sadyrbaı men ózge tulǵalarǵa qatysty isti aıaqtaǵan.
Aıyptaý Qylmystyq kodekstiń 190-babynyń 4-bóliginiń 2-tarmaǵy, 218-baptyń 1-bóligi jáne 262-baptyń 1, 2-bólikteri boıynsha qozǵalǵan. Barlyǵy 27 epızod tirkelgen.
İs materıaldary 349 tomnan turady: onyń 182 tomy – negizgi tergeý áreketteri, al 167 tomy – qujat túrindegi aıǵaqtar.
Prokýratýra málimetinshe, 20 maýsymnan 15 qyrkúıekke deıin is materıaldarymen jábirlenýshi tarap – tórt oblystyq aýyl sharýashylyǵy basqarmasynyń ókilderi tanysqan.
Al 15 qyrkúıekten bastap kúdiktiler men olardyń toǵyz qorǵaýshysy tanysýǵa kirisken.
"Tergeý ızolátorynda otyrǵan Almasbek Sadyrbaı qazirgi ýaqytta 108 tommen tanysyp úlgerdi. Qalǵan materıaldarmen tanysý jalǵasyp jatyr, aıaqtalýy 2025 jyldyń jeltoqsan aıynyń ortasyna josparlanǵan", – dep habarlady prokýratýra.
Eske salaıyq, 2024 jyldyń 6 qarashasynda Qarjy monıtorıńi agenttigi «Shańyraq» qoǵamdyq birlestiginiń tóraǵasy Almasbek Sadyrbaıǵa qatysty málimdeme taratqan bolatyn.
Onda ol 1,2 mlrd teńge kólemindegi aýyl sharýashylyǵy sýbsıdıalaryn jymqyrdy jáne alaıaqtyq jasady degen kúdikke ilingeni habarlanǵan.
