الماتى وبلىسىندا الماسبەك سادىرباي مەن تاعى التى ادامعا قاتىستى قىلمىستىق ءىس بويىنشا تەرگەۋ اياقتالدى. ولار اسا ءىرى كولەمدەگى الاياقتىق، قىلمىستىق جولمەن الىنعان تابىستى زاڭداستىرۋ جانە ۇيىمداسقان توپقا قاتىسۋ باپتارى بويىنشا ايىپتالىپ وتىر، دەپ حابارلايدى Dalanews.kz Kaztag اگەنتتىگىنە سىلتەمە جاساپ. 

وبلىستىق پروكۋراتۋرانىڭ حابارلاۋىنشا، 20 ماۋسىمدا ۆەدومستۆوارالىق جەدەل-تەرگەۋ توبى سادىرباي مەن وزگە تۇلعالارعا قاتىستى ءىستى اياقتاعان.

ايىپتاۋ قىلمىستىق كودەكستىڭ 190-بابىنىڭ 4-بولىگىنىڭ 2-تارماعى، 218-باپتىڭ 1-بولىگى جانە 262-باپتىڭ 1، 2-بولىكتەرى بويىنشا قوزعالعان. بارلىعى 27 ەپيزود تىركەلگەن.

ءىس ماتەريالدارى 349 تومنان تۇرادى: ونىڭ 182 تومى – نەگىزگى تەرگەۋ ارەكەتتەرى، ال 167 تومى – قۇجات تۇرىندەگى ايعاقتار.

پروكۋراتۋرا مالىمەتىنشە، 20 ماۋسىمنان 15 قىركۇيەككە دەيىن ءىس ماتەريالدارىمەن جابىرلەنۋشى تاراپ – ءتورت وبلىستىق اۋىل شارۋاشىلىعى باسقارماسىنىڭ وكىلدەرى تانىسقان.

ال 15 قىركۇيەكتەن باستاپ كۇدىكتىلەر مەن ولاردىڭ توعىز قورعاۋشىسى تانىسۋعا كىرىسكەن.

"تەرگەۋ يزولياتورىندا وتىرعان الماسبەك سادىرباي قازىرگى ۋاقىتتا 108 توممەن تانىسىپ ۇلگەردى. قالعان ماتەريالدارمەن تانىسۋ جالعاسىپ جاتىر، اياقتالۋى 2025 جىلدىڭ جەلتوقسان ايىنىڭ ورتاسىنا جوسپارلانعان"، – دەپ حابارلادى پروكۋراتۋرا.

ەسكە سالايىق، 2024 جىلدىڭ 6 قاراشاسىندا قارجى مونيتورينگى اگەنتتىگى «شاڭىراق» قوعامدىق بىرلەستىگىنىڭ ءتوراعاسى الماسبەك سادىربايعا قاتىستى مالىمدەمە تاراتقان بولاتىن.

وندا ول 1،2 ملرد تەڭگە كولەمىندەگى اۋىل شارۋاشىلىعى سۋبسيديالارىن جىمقىردى جانە الاياقتىق جاسادى دەگەن كۇدىككە ىلىنگەنى حابارلانعان.