Ánshi Indira Elemes óz quqyǵynyń buzylǵanyn aityp, Prezidentke ashyq úndeý joldady. Ol 2018 jyldan beri balalarymen birge Almatydaǵy turǵyn úi kesheninde turyp jatqanyn jáne úsh páterdi jeke qarajatymen «RAMS» korporatsiiasynyń ruqsatymen satyp alǵanyn málimdedi, dep habarlaidy Dalanews.kz.
«Burynǵy kúieýim túrmede otyryp, meniń páterimdi satyp jibergen»
Indiranyń aitýynsha, ol turyp jatqan páterdi úi kesheniniń qurylys kompaniiasynyń iesi Búlbúl Ramazan 25 million teńgege satyp alǵan.
"Bul páterdiń naryqtyq quny shamamen 125 million teńge", – deidi Elemes. – Biraq ol qujat júzinde 25 million teńgege satylyp, meniń jáne balalarymnyń úiinen qýylýyna negiz jasaldy.
Ánshiniń aitýynsha, bul mámile 2025 jyldyń 5 qyrkúieginde jasalǵan. Al ol týraly Indira jaqynda ǵana bilgen. Eń soraqysy, kelisimge onyń burynǵy kúieýi, qazir Almatydaǵy №72 túzetý mekemesinde qamaýda otyrǵan Kálelhan Imanmadi qatysqan bolyp shyqqan.
"Qalaisha túrmede otyrǵan adam meniń atymnan kelisimshartty buzyp, qurylys kompaniiasyna hat jazyp, 25 million teńgeni qaitaryp alady?" – dep suraidy ol. – Álde ol bir kúnge túrmeden shyǵýǵa ruqsat aldy ma, álde sol jerden hat pen túbirtekti telefon arqyly jiberdi me?
«Kóligimdi úsh ese arzanǵa satyp jibergen»
Indira Elemes burynǵy kúieýi túrmede otyryp ta sot oryndaýshylarymen bailanysqa shyǵyp, múlkine ziian keltirgenin aitady.
"Imanmadi sot oryndaýshysy Ádil Baijýmanova degenmen bailanysyp, meniń kóligimdi naryq baǵasynan úsh ese arzanǵa satyp jibergen", – deidi ol. – Sonymen qatar ol Instagram jelisinde belsendi, meniń ar-namysyma tietin jazbalar jariialap, maǵan jáne týystaryma qoqan-loqy jasap otyr.
«Politsiia qylmystyq is qozǵaýdan bas tartty»
Ánshiniń aitýynsha, ol Medeý aýdandyq politsiia basqarmasyna aryz túsirgen. Biraq ondaǵylar «qylmystyq quram joq» dep, is qozǵaýdan bas tartqan.
"Meniń páterimdi tartyp alý áreketinde asa iri kólemde jáne top bolyp jasalǵan aýyr qylmystyń belgileri bar", – deidi ol. – Soǵan qaramastan, politsiia áreketsiz otyr.
«Prezident, meni jáne balalarymdy qorǵańyz»
Indira Elemes óz úndeýinde Memleket basshysyna tikelei júgindi:
"Qurmetti Prezident, men Sizden meni jáne balalarymdy qorǵaýdy suraimyn. Memlekettik organdar is júzinde formaldy jaýaptarmen shektelip, máseleni sheshýdiń ornyna óz betinshe basqaryp otyr. Men zańsyzdyqtyń qurbany boldym", – dedi ánshi.
Qazir Indira Elemes páterin reiderlik jolmen tartyp alý áreketine qatysty ádil tergeý júrgizýdi talap etip otyr.
Eske salaiyq, Almatyda ánshi Indira Elemestiń burynǵy kúieýi jáne UQK-niń eks-basshysy Kárim Másimovtiń ákesi Qajymhan Másimovtiń seriktesi bolǵan Kálelhan Imanmádi alty jylǵa sottalǵan bolatyn.
Ol Másimovter otbasymen birge «Másimovtiń saýyqtyrý ortalyǵyn» (keiin «Raiana» dep ózgertilgen) basqarǵan. Bul ortalyq meditsinalyq test-jolaqtardy aýrýhanalarǵa jetkizýmen ainalysqan. Imanmádi Másimovtermen birge qoǵamdyq sharalarda jii kórinetin.
