Búgin Senatta mádeniet, bilim, otbasy jáne memlekettik baqylaý salalaryndaǵy zańnamany jetildirýge baǵyttalǵan zań jobasy qaraldy. Qujat Parlament depýtattarynyń bastamasymen ázirlengen, dep habarlaidy Dalanews.kz.
Mádeniet salasyndaǵy túzetýler
Senatorlar zańnyń negizgi tujyrymdamasyn qoldap, birqatar baptarǵa jańa redaktsiialar usyndy.
Endi 200 jáne odan kóp kórermen qatysatyn kontsertterde fonogramma (vokaldyq jazba) qoldanýǵa tyiym salynady.
Fonogramma tek televiziialyq kontent jasaý kezinde nemese kontsert ótkizýge beiimdelmegen oryndarda ǵana paidalanylýy múmkin.
Sondai-aq fonogramma qoldanylǵany týraly kórermendi aldyn ala habarlaý mindeti zańmen bekitildi. Budan bólek, buqaralyq aqparat quraldary men onlain-platformalarda shyǵarmany qoldaný kezinde avtordyń aty-jónin kórsetý talaby naqtylandy.
Bilim jáne áleýmettik baǵyttar
Zań jobasynda bilim salasyna da mańyzdy jańalyqtar engizilgen:
Balabaqsha salý úshin rezervke qoiylǵan jerlerdi jeke menshikke berýge tyiym salynady;
Joǵary oqý oryndary men kolledjderge memlekettik bilim berý tapsyrysy olardyń reitingine qarai bólinedi;
Shetelde magistratýra, aspirantýra, doktorantýra nemese rezidentýra baǵdarlamalary boiynsha oqyǵan túlekterge mindetti eńbek ótelimin keiinge qaldyrý múmkindigi beriledi;
Memlekettik tapsyrys boiynsha bilim alyp, múmkindigi shekteýli balany tárbielep otyrǵan nemese I toptaǵy múgedekke kútim jasap júrgen túlekter mindetti eńbek óteliminen bosatylady;
Halyqaralyq ǵylymi baiqaýlardyń jeńimpazdary men olardyń jetekshilerine birjolǵy syiaqy tóleý tártibi engiziledi.
Basqa mańyzdy túzetýler
Sonymen qatar zań jobasy:
Bilim berý uiymdaryna áigili tulǵalardyń esimin berý nemese ataýyn ózgertý kezinde Onomastika komissiiasymen kelisý tártibin engizedi;
Memlekettik kitaphanalarǵa mádeni-aǵartýshylyq jáne bilim berý is-sharalaryn ótkizý quqyǵyn beredi;
Akimattarǵa kitap qory men kitaphana júiesin saqtaý jáne damytý jónindegi jańa mindetter júkteidi.
Senat engizgen tolyqtyrýlar men túzetýler eskerilgen zań jobasy qaitadan Májiliske qaitaryldy.
