Astanadaǵy "№81 Astana English School halyqaralyq mektebi" KMM burynǵy basshylyǵynyń ústinen búdjet qarjysyn iri kólemde urlady degen kúdikpen qylmystyq is qozǵaldy. Qazir bul derek boıynsha elordanyń Ekonomıkalyq tergeý departmenti tergeý júrgizip jatyr, - dep habarlaıdy Dalanews.kz 

Qarjylyq monıtorıń agenttigi málimetinshe, mekteptiń burynǵy dırektory men bas býhgalteri 900 mln teńgeden asa aqshany zańsyz ıemdengen.

Tergeý nátıjesinde bul somanyń bir bóligi – ata-analardan daıyndyq synyptaryna oqytý jáne jazǵy lagerge qatysý úshin qolma-qol alynǵan aqsha ekeni, alaıda bul qarajat mekeme shottaryna túspeı, urlanǵany anyqtalǵan.

"Sonymen qatar, shamamen 16 mln teńge is júzinde uıymda jumys istemeıtin jalǵan qyzmetkerler atyna aýdarylǵan. Olardyń qatarynda kúdiktilerdiń jalǵan túrde rásimdelgen týystary da bar", - dep jazylǵan habarlamada.

Jymqyrylǵan qarjyǵa kúdiktiler jalpy quny 382 mln teńge bolatyn jyljymaıtyn múlik pen avtokólik satyp alǵan. Onyń ishinde elordadaǵy bir kotej, eki páter jáne kólik bary belgili boldy.

Qazir bul múlik sot sanksıasymen tárkilenip, tyıym salyndy.

Qylmystyq iske qatysty tergeý jalǵasyp jatyr.