Almaty oblysynyń Qarasai aýdanyna qarasty Umtyl aýyldyq okrýginde 10 jasar balany eki qabaǵan it talap, aýyr jaraqattady. Oqiǵa 30 mamyrda bolǵan. Oqiǵanyń basty kýágeri ári balany qutqaryp qalǵan aýyl turǵyny, zeinetker Serikbek Saqaibekovtyń aitýynsha, sol kúni kóligimen jolaýshy áieldi úiine jetkizip bara jatqanda, bir top balanyń shýlap, jan-jaqqa qasha jónelgenin kórgen, dep jazady Dalanews.kz.
«Balalardyń úreilenip qashqanyn kórip, bir sumdyq jaǵdai bolǵanyn sezdim. Qolymda eshbir qural joq edi, kóligimniń esik qaltasynan tek balyqqa alyp júretin bákimdi aldym da, birden oqiǵa ornyna júgirdim. Barsam, eki úlken qabaǵan it balaǵa jabysyp, ony súirep, julmalap jatyr eken. Pitbýl tuqymdas it balanyń sanyn shainap jatty, al ekinshi ovcharka iyǵynan ustap, jerge súirep barady. Qanǵa boialǵan bala «Aǵa, qutqaryńyzshy!» dep janushyra aiǵailady. Ony kórgende oilanbastan itterge qarsy shabýyldap, ekeýin de uryp óltirdim», – deidi Serikbek aqsaqal Stan.kz-ke bergen suhbatynda.
Qazir 10 jasar bala Qarasai aýdandyq ortalyq aýrýhanasynda aýyr jaraqatpen em alyp jatyr. Balanyń anasy Ekaterina Býrmistrovanyń aitýynsha, ulynyń jaǵdaiy óte qiyn.
«Ulymnyń qulaǵynyń jartysy joq, beti men basy qatty zaqymdanǵan, san etin itter julyp alǵan. Jaraqattary aýyr. Qazir meditsinalyq qujattardy jinap, sotqa júginýge daiyndalyp jatyrmyz. Itterdiń ieleri bolsa balanyń ózi kináli, aýmaqqa jaqyndady dep jalǵan aityp otyr», – deidi ol.
Serikbek Saqaibekovtiń erligi turǵyndar arasynda qyzý talqylanyp, kópshiliktiń qoldaýyna ie boldy. Alaida ólgen itterdiń ieleri zeinetkerden ótemaqy talap etip otyr eken.
«Qazir itterdiń ieleri kelip, maǵan itteri qymbat bolǵanyn aityp, aqshasyn tóleýimdi surap otyr. Sonda balany qutqarmai, qansyrap jatqanyn únsiz qarap turýym kerek pe edi?» – dep kúiindi ol.
Umtyl aýyldyq okrýginiń ákimi Islam Baýyrjanuly oqiǵaǵa qatysty tiisti organdar shara qabyldaǵanyn, itterdiń iesine aiyppul salynǵanyn habarlady. Sondai-aq, ákimdik itter ustalǵan ortalyqtyń zańdylyǵyn tekseretin bolady.
Almaty oblystyq politsiia departamenti atalǵan fakt boiynsha qylmystyq is qozǵalǵanyn rastady. Tergeý barysynda itter esirtki men ishimdikke táýeldilerdi ońaltý ortalyǵyna tiesili ekeni anyqtalǵan.
«Kináliler mindetti túrde zań aiasynda jaýapqa tartylady», – dedi politsiia ókilderi.
Qazir jergilikti turǵyndar men kásipkerler balanyń emine qarjy jinaýdy bastap ketti. Densaýlyq saqtaý basqarmasynyń málimetinshe, zardap shekken balanyń jaǵdaiy turaqty bolǵanymen, jaraqaty aýyr deńgeide.
