Soltústik Afrika jaǵalaýynda apatqa ushyraǵan tankerde Qazaqstan munaiy bolýy múmkin degen aqparatqa bailanysty Energetika ministrligi resmi málimdeme jasady, - dep habarlaidy Dalanews.kz
Vedomstvonyń habarlaýynsha, apatqa ushyraǵan Vilamoura tankeri jeke menshikke tiesili jáne sońǵy ret Liviia porttarynda júktelgen.
«Apat kezinde tanker bortynda Qazaqstan munaiy bolǵany týraly aqparat shyndyqqa janaspaidy», – delingen ministrlik habarlamasynda.
Bloomberg agenttiginiń málimetinshe, grek TMS Tankers kompaniiasyna tiesili tanker bortynda 1 million barrel munai bolǵan. Liviia jaǵalaýynda oryn alǵan jarylys saldarynan kemeniń mashina bólimi sý astynda qalǵan, alaida munai tógilý deregi tirkelmegen. Ekipaj músheleri zardap shekpegen, tankerdi qazirgi ýaqytta Grekiiaǵa súirep apara jatyr.
Vilamoura kemesi Zeitin porty arqyly Gibraltar buǵazyna bet alǵan. Teńiz joldaryn baqylaý júieleriniń málimetinshe, bul tanker sáýir jáne mamyr ailarynda Reseidiń Ýst-Lýga portyna jáne Novorossiisk mańyndaǵy KTK terminalyna toqtaǵan.
Ministrlik bul oqiǵanyń Qazaqstan munaiymen esh bailanysy joq ekenin jáne resmi derek kózderine súienýdi eskertti.
