Elimizdiń ǵylym salasyna ólsheýsiz úles qosqan, dara tulǵa, himiia ǵylymdarynyń doktory, ǵalym Qanysh Sátpaevtyń urpaǵy Álima Qainekeiqyzy Jarmaǵambetova ómirden ozdy. Bul týraly Ǵylym jáne joǵary bilim ministri Saiasat Nurbek jazdy, - dep habarlaidy Dalanews.kz
"Ǵalymnyń ómir jolyna úńilsek, Álima Qainekeiqyzy – himiia ǵylymdarynyń doktory, Ulttyq ǵylym akademiiasynyń Kataliz jáne elektrohimiia institýtynda laboratoriia meńgerýshisi qyzmetin atqardy.
Ol 1973 jyldan búgingi kúnge deiin uzaq jyldar boiy D.V. Sokolskii atyndaǵy Janarmai, kataliz jáne elektrohimiia ǵylymi-zertteý institýtynda injener, kishi ǵylymi qyzmetker, aǵa ǵylymi qyzmetker, bas ǵylymi qyzmetker, institýt direktorynyń orynbasary sekildi túrli laýazymdardy abyroimen atqaryp, sońǵy jyldary organikalyq kataliz zerthanasynyń meńgerýshisi laýazymdaryn atqardy.
Qanysh Imantaiulynyń óz sózimen aitsaq, «maman, bilimdi ǵylym kadrlary – bizdiń negizgi kúshimiz, ǵylymdaǵy basty tulǵa». Álima Qainekeiqyzy osyndai tulǵalardyń qatarynda boldy", - dep jazdy Saiasat Nurbek.
Álima Qainekeiqyzy «Kinetika jáne kataliz», «Ekologiialyq kataliz», «Munai himiiasy», «Polimermen turaqtandyrylǵan nanoqurylymdy katalizatorlar» pánderi boiynsha magistranttar men doktoranttarǵa dáris oqyp, kóptegen shákirt tárbielegen.
"300-den astam ǵylymi maqalanyń avtory atanyp, eńbekteri halyqaralyq bedeldi basylymdarda jariialandy. Onyń ishinde Scopus málimetter bazasyndaǵy CiteScore kórsetkishi 35-ten kem emes basylymdarda 6 maqala jáne CiteScore kórsetkishi 20-dan kem emes basylymdarda 4 maqalasy jaryq kórgen Á.Jarmaǵambetovanyń ǵylymdaǵy joly bizge úlgi. Germaniia, Frantsiia, Italiia, Finliandiia, Majarstan, Túrkiia, Resei jáne Ózbekstan elderinde ótken halyqaralyq konferentsiialarǵa qatysyp, qazaq ǵylymynyń atyn álemge tanytty.
Marqumnyń otbasyna, týǵan-týystaryna, áriptesterine jáne barsha ǵylymi qaýymǵa qaiǵyryp kóńil aitamyn. Jatqan jeri jaily, topyraǵy torqa bolsyn", - dedi ministr.
