Eńbek jáne halyqty áleýmettik qorǵaý vitse-ministri bolǵan Aqmádi Sarbasov ustaldy, dep habarlaidy Dalanews.kz.
Qazirgi ýaqytta Aqmádi Sarbasov –eńbek resýrstaryn damytý ortalyǵynyń prezidenti qyzmetin atqarady. Bul uiym Eńbek jáne halyqty áleýmettik qorǵaý ministrligine baǵynysty.
"Za nami vyehali" telegram arnasynyń málimetinshe, keshe Almaty qalasynyń tergeý sotynyń kestesinde onyń aty-jóni paida boldy. Osydan keiin tergeý organyna jáne ministrlikke resmi suraý joldanǵan, alaida naqty jaýap tek búgin belgili bolǵan.
Ministrliktiń málimdemesi:
"Eńbek jáne halyqty áleýmettik qorǵaý ministrligi «Eńbek resýrstaryn damytý ortalyǵy» AQ basshysynyń ustalǵanyn rastaidy. Ministrlik tergeý organdaryna belgilengen tártipke sáikes kómek kórsetip jatyr".
Aqmádi Sarbasov ministrlik qurylymynda 2005 jyldan beri jumys istedi, 15 jyl ishinde vitse-ministr dárejesine deiin kóterildi. 2025 jyly ol Eńbek resýrstaryn damytý ortalyǵyna basshylyqqa aýysty. Buǵan deiin eshqandai daý-sharǵa ilikpegen, keibireýlerdiń aitýynsha, ol – «beitarap saiasatker».
Aqmádi Sarbasovpen qatar ortalyqtyń burynǵy basshysy Dáýlet Arǵandykov pen «Birinshi kredittik biýro» kompaniiasynyń bas direktory Rýslan Omarovqa da bultartpaý sharasy qoldanylǵan.
Dáýlet Arǵandykov ortalyqqa deiin 2014–2015 jyldary Densaýlyq saqtaý jáne áleýmettik qorǵaý vitse-ministri bolǵan. 2015–2018 jyldary Eńbek resýrstaryn damytý ortalyǵynyń prezidenti qyzmetin atqaryp, keiin konsalting salasyna ketken. 2020 jyly ortalyqqa qaita oralǵan, alaida eki ai buryn prezidenttik qyzmetinen ketken.
Jýrnalist Mihail Kozachkovtyń jazýynsha, tergeý boljamyna sáikes, ortalyqta azamattar men olardyń nesieleri týraly aqparatty «Birinshi kredittik biýroǵa» aqyly túrde bergen. Kompaniia qyzmetkerleri VPN arqyly memlekettik uiym bazalaryna qosylyp, qajetti derekterdi alǵan. Keiin, Kozachkovtyń málimeti boiynsha, biýro qazaqstandyqtarǵa qatysty kredittik dose ázirlep, ony ekinshi deńgeili bankterge jibergen. Al bul jumys úshin bankter biýroǵa aqsha tólegen.
Biýro basshysy Rýslan Omarov 80 myń dollar berip jatqan kezde ustalǵan. Ol ortalyq basshylyǵyna júieli túrde para berdi degen kúdikke ilingen.
Rýslan Omarov kredittik biýrodan bólek, túrli bankter qurylymynda jumys istegen. Birneshe ai buryn ol Ulttyq ekonomika ministrligi janyndaǵy qoǵamdyq keńeske múshe retinde kirgen.
