Depýtattyń aitýynsha, búginde jalpy qoǵam arasynda memleketke degen senbeýshilik, memlekettik korpýsty mensinbeý, atqaryp jatqan jumystaryn joqqa shyǵarý, jemqorlyq pen úilesimsizdik ordasy degen pikir qalyptasqan.
"Sońǵy kezderi buqaralyq aqparat quraldary ǵana emes, jalpy qoǵam arasynda kez kelgen jaǵdaidy, aqparatty ózinshe túsindirý, árkim ózine qarai buryp alý, qoǵamdyq shý týdyrý maqsatynda jalǵan aqparat berý sekildi úrdis qalyptasyp aldy. Osyndai jaǵdailardyń saldarynan kóp jaǵdaida túsinispeýshilikter bolyp jatady.
Máselen, Toqaevtyń kezekti otyrystaǵy "Eger memlekettik qyzmetker sheshim qabyldaý kezinde biýdjet qarajatyn jymqyramyn nemese para alý arqyly zańsyz jolmen baiimyn degen aram piǵylsyz qatelik jasap qoisa, qylmystyq jaýapkershilikke tartylmaýy kerek" degen iaǵni korrýptsiiaǵa qarsy kúrestiń keibir aspektilerin ózgertý jónindegi usynysyna qatysty aitylyp jatqan alyp-qashpa áńgimeleler osyndai jaǵdaidan týyndap otyr.
Ashyǵyn aitý kerek, osyndai jaittardyń saldarynan qazirgi tańda memleketke degen senbeýshilik, memlekettik korpýsty mensinbeý, atqaryp jatqan jumystaryn joqqa shyǵarý, basqarý júiesi tek qana jemqorlyq pen úilesimsizdik ordasy degen pikir qalyptasyp otyr. Osynyń saldarynan dep dep oilaimyn sońǵy ýaqyttarda memlekettik qyzmetke barsam deitin azamattardyń sany birshama azaiǵany baiqalyp otyr. Resmi statistikaǵa sensek, bir orynǵa 0,06 adamnan ǵana keledi eken.
Bul árine, durys faktor emes. Bizge táýekelshil, memleket isine qoryqpai aralasyp ketetin jańa býyndaǵy mamandar kerek. Kez kelgen jaǵdaidan alyp shyǵatyn korpýs qajet. Toqaevtyń joǵarydaǵy sózi arqyly osyny aitqysy kelgeni daýsyz.
"Sen mynany alasyń, men munshasyn alam" dep el qarjysyn ońdy-soldy shashyp, qasaqana bólisip alatyn ia bolmasa basqa da sybailastyq, tanystyq joldar arqyly el ekonomikasyna qaýip tóndiretinder bolmasa, usaq-túiek qatelikterge jol bergen qyzmetkerlerdi jappai jemqor degen aiyp taǵyp, qaralaý durys emes, rasynda. Negizi Memleket basshysy Toqaev úlken máseleni kóterip otyr.
Naqty mysaldarmen aitar bolsaq, meditsinalyq qatelik degen dúnie bar. Bul jerde adami da, tabiǵi da faktor bolyp jatady. Ádeii istelmeitin qatelik. Sol sáttegi jaǵdai, patsienttiń fiziologiialyq ereksheligi, dárilerge qarsy reaktsiia berý sekildi dúnieler bolady. Alaida bul jerde de tek dárigerdiń qateligi degen uǵym qalyptasqan. Memlekettik qyzmet te osyndai.
Onyń ústine bizdiń Antikor tek jazalaýshy mekemeniń rólin somdap otyr. Antikor jemqorlyqtyń aldyn alatyn, analitikalyq ortalyq bolyp qaita qurylýy kerek sekildi. Menińshe, "Eger memlekettik qyzmetker sheshim qabyldaý kezinde biýdjet qarajatyn jymqyramyn nemese para alý arqyly zańsyz jolmen baiimyn degen aram piǵylsyz qatelik jasap qoisa, qylmystyq jaýapkershilikke tartylmaýy kerek" degen sózine Toqaev osyny meńzegen tárizdi", - deidi ol.
