Aqtóbe oblysynyń qylmystyq ister jónindegi mamandandyrylǵan aýdanaralyq soty dárigerdi erekshe qatygezdikpen óltirgen is boıynsha úkim shyǵardy. Sh. esimdi medısına qyzmetkeri kináli dep tanylyp, 20 jylǵa bas bostandyǵynan aıyryldy, dep habarlaıdy Dalanews.kz.

Sottyń habarlaýynsha, aıyptalýshy Sh. Qazaqstan Respýblıkasynyń Qylmystyq kodeksiniń 99-baby 2-bóliginiń 8-tarmaǵy (paıdakúnemdik nıetpen adam óltirý) jáne 188-baby 3-bóliginiń 1-tarmaǵy (iri kólemde urlyq jasaý) boıynsha kináli dep tanylǵan.

«Qylmystar jıyntyǵy boıynsha Sh.-ǵa 20 jyl merzimge bas bostandyǵynan aıyrý jazasy taǵaıyndaldy», – dep habarlady sot.

İs qazylar alqasynyń qatysýymen qaraldy.

Qylmystyń mán-jaıy

Tergeý materıaldaryna sáıkes, aıyptalýshy Sh. dıalız ortalyǵynda medısına qyzmetkeri bolyp jumys istegen jáne 1956 jyly týǵan dáriger A.-ǵa telefon men bank qosymshalaryn ornatýǵa kómektesip júrgen. Ol dárigerdiń esepshottarynda iri somada aqsha bar ekenin bilgen.

Kózin emdetý úshin Astanaǵa ketken kezde dáriger páteriniń kiltin senip Sh.-ǵa qaldyrǵan. Osy sátti paıdalanǵan Sh. dárigerdiń jalǵyz turatynyn bilip, ony óltirip, aqshasyn ıemdený josparyn qurǵan.

«Aıyptalýshy dárigerdi páterinde kútip, oǵan asúı baltasymen ómirge qaýipti soqqylar jasaǵan. Keıin denesin tońazytqyshqa jasyryp qoıǵan», – delingen sot málimetinde.

Qylmys jasaǵannan keıin Sh. aldyn ala satyp alǵan sılıkon betperdeni kıip, marqum dárigerdiń esepshottarynan 5 268 000 teńge sheship alǵan. Sondaı-aq onyń uıaly telefondary, plansheti men noýtbýgyn urlap, barlyǵy 1 966 860 teńge materıaldyq zalal keltirgen.

Osylaısha, sot aıyptalýshynyń kinási tolyq dáleldendi dep tanyp, ony uzaq merzimge bas bostandyǵynan aıyrýǵa úkim shyǵardy.