– Erekshe qajettilikteri bar azamattardy áleýmettendirý jáne ońaltý úshin jaǵdaı jasaýǵa erekshe nazar aýdaramyz. Mysaly, bıyl jazda kórý qabileti buzylǵan balalarǵa arnalǵan mamandandyrylǵan balabaqsha ashyldy (Kenesary kóshesi, 9/1, Saryarqa aýdany). Balabaqshada pedagogtermen qatar medısına qyzmetkerleri de balalarmen aınalysady. Bul balanyń fızıkalyq, psıhıkalyq damý erekshelikterin, jeke múmkindikteri men qabiletterin eskere otyryp, balanyń jeke basyn jan-jaqty qalyptastyrý, balalardyń mektepke daıyndyǵyn qamtamasyz etý. Mekemede fızıoterapıa, logoped-defektolog, oftalmolog kabınetteri bar, – dep atap ótti Altaı Kólginov.
Qala aýdandarynda 29 «Úıdegi dáriger» nysany ashyldy, ınvataksı sany 2 esege artqan. Jańa úılerdiń birinshi qabattarynda «qadamdyq qoljetimdilik» qaǵıdaty boıynsha balalarǵa arnalǵan shaǵyn ortalyqtar, ońaltý ortalyqtary, balabaqshalar, medısınalyq ortalyqtar ashylýda.
Budan basqa, ótken jyly elordada BSP, aýtızm, Daýn sındromy syndy dıagnozdary bar balalardy ońaltýmen aınalysatyn birqatar iri ońaltý ortalyqtary ashylyp tabysty jumys isteýde. Aıtalyq, «Asyl Mıras» jańa aýtızm ortalyǵy (Ýálıhanov kóshesi) aýtıstik spektrdiń aýrýlary bar balalardy 50%-ǵa kóbirek qamtýǵa múmkindik bergen. Bul joba B.Ótemuratov qorymen birlesip, júzege asyrýlyýda. Sol úıde taǵy bir ońaltý ortalyǵy BSP, aýtızm dıagnozy jáne basqa da birqatar aýrýlary bar balalarmen aınalysady.
№ 1 qalalyq balalar aýrýhanasy bazasynda Tuńǵysh Prezıdent Qory men «Samuryq-Qazyna» qoldaýymen ótken jyldyń kúzinde «Qamqorlyq» ońaltý ortalyǵy ashyldy. Bul BSP dıagnozy bar 600-ge jýyq balany jyl saıyn qosymsha tegin medısınalyq kómekpen qamtýǵa múmkindik beredi.
