Almatylyq bloger kóterme bazar men qaladaǵy sýpermarketteriniń birindegi azyq-túlik baǵasyn salystyryp kórdi. Ol bul týraly Instagram-daǵy paraqshasynda video jariialady, dep habarlaidy Dalanews.kz.
Rozybakiev kóshesindegi tanymal sýpermarkettiń birine bas suqqan bloger Vlad Pritýliak eki aradaǵy baǵada kádimgidei úlken aiyrma baryn anyqtady.
Mysaly, kóterme saýdada Alpen Gold shokolady 450 teńge tursa, al sýpermarkettegi quny 1179 teńge bolyp shyqty. Baǵadaǵy aiyrmada shamamen 2,5 ese qymbatshylyq bar. Taýyq eti de bazarda arzanyraq eken: Magnum-da onyń bir kelisi 2275 teńge tursa, bazar sóresindegisi - 1750 teńge. Taýyq etiniń basqa túrleri boiynsha baǵa aiyrmasy keminde 500 teńgeni quraidy.
Bazarda jumyrtqanyń 10 danasyn 520 teńgeden tabýǵa bolsa, dúkendegisi 895 teńgeden bastalady. Kóterme saýdada 6%-dyq súttiń 1 litri - 500 teńge, sýpermarkettegisi - 665 teńge. Makarondardyń bir kelisi bazarda 350-400 teńge aralyǵynda bolsa, al saýda jelisinde 455-497 teńgeden satylady.
Biraq osyǵan uqsas keri jaittar da tirkelgen. Mysaly, 1 litr kúnbaǵys maiynyń kóterme saýdadaǵy quny 810-900 teńge bolsa, saýda jelisinde 781 teńgeni qamtidy. Qant ta sýpermarkette áldeqaida arzan bolyp shyqqan: onyń 1 kelisi bazarda 500 teńge tursa, dúkendegisi - 399 teńge.
Bárinen buryn kartop baǵasy erekshe kózge tústi: bazarda bólshek saýdada onyń 1 kelisi - 250 teńge, kóterme saýdada — 200 teńge, al sýpermarkettegi qun - 176 teńge.
Buǵan deiin ekonomisttiń tabysy ósken halyqtyń jaǵdaiy nege jaqsarmai jatqanyn tsifrlarmen dáleldep bergen bolatyn. Rýslan Sultanovtyń aitýynsha, 2025 jyldyń II-toqsanynda jan basyna shaqqandaǵy aqshalai tabys 359 638 teńgege jetip, bir jylda 8,9%-ǵa artypty. Qaǵazda bul ósim pozitivti qarqyn retinde kórsetiledi. Alaida qymbatshylyq údep, tutyný baǵasy joǵary qarqynmen ekpindep jatqan ómirde mundai nominaldy ósim halyq jaqsyraq ómir súre bastady degendi áste bildire almaidy. Tek olardyń shyǵyny qymbattai túskeni ǵana aiqyndaidy.
"Sonymen qatar kei aimaqtarda qaryz ben nesieni óteýge ketetin shyǵyn joǵary, bul úles Ulytaý oblysynda 12%-dan astam, Qaraǵandyda shamamen 10%-dy quraidy. Bul borysh júktemesin aýyrlatyp, paiyzdyq mólsherlemeler óskende nemese tabys azaiǵanda kei otbasylardy tyǵyryqqa tirkep, kedeilendire túsedi.Munyń bári negizgi máseleni aiqyn kórsetedi: tabys ósip jatqanymen, satyp alý qabileti artpai otyr. Shynaiy tabys (infliatsiiany shegergende) áldeqaida baiaý ósip jatyr, kei óńirlerde múlde toqyrap qalǵan. Demek, halyq burynǵydai taýar men qyzmettiń sol kólemin ǵana tutynady, tek qymbattyraq baǵamen", - deidi ekonomist.
