«Memleket basshysy «Babalarymyz ejelgi zamannan beri Ulys kúnin jyl basy retinde atap ótken. Qazir Áz-Naýryz kúlli halyqqa ortaq, jalpyulttyq merekege ainaldy. Ony ultyna, dinine qaramastan barsha jurtymyz erekshe kútedi, birge atap ótedi» – dep aitqandai, Naýryz – barsha qazaqstandyqtardyń súiikti meiramy. Ol halqymyzdyń bolmysy men dúnietanymyn, birligi men tatýlyǵyn aishyqtaityn, adamzatqa ortaq izgilik qundylyqtaryn dáripteitin erekshe kún» dedi aimaq basshysy.
Oblys ákimi quttyqtaý sózinde 11 naýryzda Prezident qabyldaýynda bolǵanda Memleket basshysy óńirdiń ózekti máselelerine kóńil bólip, tiisti tapsyrmalar bergenin jetkizdi. Prezidenttiń qoldaýymen Semei qalasynda oblystyq aýrýhana, jańa teatr salynady. Semeidegi Oqýshylar saraiynyń qurylysyn aiaqtaýǵa 8,6 milliard teńge qarjy bólinedi.
«Sondai-aq, uly Abaidyń 180 jyldyǵyna tartý retinde, elimizdiń ár óńiri oblysymyzǵa syilyq jasap, áleýmettik nysandardy jańartý-jańǵyrtýǵa kómektesýin ótingen usynysymyzdy el Prezidenti qoldady. Qazirdiń ózinde keibir oblystar yqylasyn bildirip, habarlasa bastady. Buiyrsa biyl jaz boiy Semei qalasy úlken qurylys alańyna ainalady. Munyń bári óńirimizdiń eńsesin kóterip, damýyn jedeldete túspek. Abai oblysy halqynyń qoldaýymen alda talai aýqymdy jobalardy atqaryp, óńirdi birge kórkeitemiz dep senemin. Óńirimiz qashanda ulttyq qundylyqtardy kóz qarashyǵyndai qasterlep, ata dásúr men zaman damýyn ushtastyryp kele jatqan jaqsylyqqa qushtar, jańalyqqa ashyq aimaq. Uly Abaidyń mekeni, Abaidyń izgi jolyn jalǵastyrǵan alash arystarynyń ortalyǵy bolǵan qasietti jer. Ulystyń uly kúninde ár shańyraqqa qut-bereke, amandyq, yrys-nesibe tileimin. Naýryznama onkúndigi igi bastamalarǵa serpin bersin. Ulyq meiram jaqsylyǵymen kelip, eldigimizdi nyǵaityp, mereiimizdi ósirsin» dedi aimaq basshysy.
Naýryz meiramyna orai oblys boiynsha 300-ge jýyq kiiz úi tigildi. Onyń 50-den astamy Semeidiń ortalyq alańy, qalanyń Qaraǵaily, Áýezov alańy men temirjol vokzaly, Silikat, Teri-bylǵary zaýyty aýdandary, Shyǵys, Bobrovka jáne Iýnost kentterinde ornalastyryldy. Ár kiiz úige Abai aýyly, Shákárim aýyly, Dostyq aýyly, Meiirim aýyly, Ónerpazdar aýyly, Rýhaniiat aýyly, Bilim ordasy, Ardagerler aýyly, Shapaǵat, Jasyl el, Tabys, Bolashaq, Sáýlet, Zań men tártip, Aýylym – altyn besigim, B.Momyshulynyń týǵanyna 110 jyl, N.Tilendievtiń týǵanyna 100 jyl, Sh.Qaldaiaqovtyń týǵanyna 95 jyl, I.Esenberlinniń týǵanyna 120 jyl, Sh.Ábenovtiń týǵanyna 125 jyl, J.Nájimedenovtiń týǵanyna 90 jyl, QR Konstitýtsiianyń 30 jyldyǵy degen arnaiy ataýlar berilgen.
22 naýryz kúni merekelik sharalar oblystyń barlyq aýdandary men qalanyń barlyq shaǵyn aýdandaryn qamtydy. Semei qalasy Naýryzdy keń kólemde atap ótý úshin mazmundy baǵdarlama ázirledi. Ortalyq alańda qolóner kórmeleri, ulttyq oiyndar, sporttyq jarystar, fotoaimaqtar daiyndaldy.
Merekeniń kórkin keltirgen sharanyń biri – kompozitor Nurǵisa Tilendievtiń 100 jyldyǵyna orai júz jas dombyrashynyń sazger shyǵarmalaryn bir mezgilde oryndaýy. Bul jurtshylyqqa mýzyka men tarihi taǵylymǵa toly erekshe atmosfera syilady.
Semeilikter men qala qonaqtary ortalyq alańda qazaqstandyq estrada juldyzdary «Alashuly», «MýzArt» toby men Á.Qashaýbaev atyndaǵy memlekettik filarmoniiasynyń, qalalyq mádeniet saraiy ánshileriniń ónerin tamashalady.
Keshki baǵdarlama aiasynda «Alashuly» toby, «Ádemi-ai» dýeti men Qairat Nurtas, jergilikti ónerpazdar óner kórsetetin bolady.
