Abaı oblysynda 226 myńnan astam bala bilim alatyn 561 bilim berý mekemesi jumys isteıdi. Bul týraly óńirlik komýnıkasıalar qyzmetinde ótken baspasóz máslıhatynda oblystyq bilim basqarmasynyń basshysy Nurjan Ahmetqalıev málimdedi.
- Semeı qalasynda bıyl mektepke deıingi bilim berý sapasyn arttyrý jáne balalardy tolyq qamtý maqsatynda 2 jekemenshik balabaqsha ashylyp, 183 jańa oryn paıdalanýǵa berildi. Sonymen qatar qoldanystaǵy mektepke deıingi mekemelerdiń syıymdylyǵy 1466 orynǵa ulǵaıtyldy. 2027 jylǵa deıin memlekettik-jekemenshik áriptestik aıasynda 2100 orynǵa arnalǵan 9 balabaqsha salý josparlanǵan. Budan bólek, oblystaǵy 8700 oqýshynyń oryn tapshylyǵy máselesi 4 jaıly mektep pen 6 shaǵyn jınaqty mekteptiń qurylysy arqyly sheshiletin bolady, – dep málimdedi bilim basqarmasynyń basshysy.
«Jaıly mektep» ulttyq jobasy aıasynda tórt mekteptiń qurylysy qarqyndy júrgizilýde. Qosymsha bilim berýdi damytý maqsatynda kópfýnksıonaldy Oqýshylar saraıynyń qurylysy bastalyp, ony 2025 jyly paıdalanýǵa berý josparlanǵan. Sonymen qatar Abaı aýdanynda 40 oryndyq balalarǵa arnalǵan jazǵy lager salynýda.
- Bilim salasyna jeke ınvestısıalar tartý nátıjesinde bıyl oblys ortalyǵynda «KAZ Minerals Management» kompanıasynyń qarjylandyrýymen 1200 oryndyq IT mektep ashyldy. Sonymen qatar tehnıkalyq jáne kásiptik bilim berý salasyn damytý maqsatynda IT jáne jańa tehnologıalar joǵary koleji óz jumysyn bastady. Qyrkúıek aıynda «Qarajyra» AQ-nyń jeke ınvestısıalary esebinen M.O. Áýezov atyndaǵy pedagogıkalyq kolejde 300 oryndyq konsert zaly paıdalanýǵa berildi, – dedi Nurjan Ahmetqalıev.
Spıkerdiń aıtýynsha, bilim berý mekemeleriniń materıaldyq-tehnıkalyq bazasyn nyǵaıtý maqsatynda 46 mektepke 48 jańa pándik kabınet satyp alynyp, 320 ınteraktıvti panel ornatylǵan. «Qazaqstan halqyna» qorynyń qoldaýymen 4 tirek mektepte jalpy somasy 1 mlrd teńgege jańǵyrtý jumystary júrgizildi. Sonymen qatar aýyldyq 127 mektepte Starlink júıesi qosylyp, ınternet jyldamdyǵy 4 Mbıt/s-ten 100-200 Mbıt/s-ke deıin artqan.
Abaı oblysynda balalardy sapaly bilimmen, zamanaýı ınfraqurylymmen qamtamasyz etý basymdyqtardyń biri bolyp qala beredi. 2024 jyly qol jetkizgen jetistikter oblystyń bilim salasyndaǵy bolashaǵy jarqyn ekenin aıǵaqtaıdy. 2025 jylda osy baǵyttaǵy jumystar jalǵasady.
