Búgin Túrkistanda balalardyń qurmetine Qazaqstan Respýblikasy Prezidentiniń atynan Jańa jyl merekesine arnalǵan shyrshatoi ótti. Merekelik shyrsha shamyn oblys ákimi Darhan Satybaldy jaǵyp, balalardy Jańa jyl merekesimen quttyqtady.
«Búgin biz jańa jyl qarsańynda sizdermen birge qýanysh pen shattyqqa toly erekshe sátterdi bólisip otyrmyz. Prezidenttik shyrsha – bul sizder úshin ǵajaiyptyń esigin ashyp, ertegi álemine jeteleitin merekelik kún. Jańa jyl – armanǵa qanat bitirip, bolashaqqa senimmen qaraityn meiram. Al sizder – sol bolashaqty jarqyn etetin elimizdiń maqtanyshysyzdar. Túrkistan oblysynda balalardyń sapaly bilim alyp, óz qabiletterin damytýyna erekshe nazar aýdarylýda. 2024 jyly Memleket basshysynyń tapsyrmasymen óńirimizde 29 jaily mekteptiń qurylysy bastalyp, oqýshylardyń igiligine berilýde. Ótken jyly 40 myńnan astam oqýshy jazǵy demalys lagerlerine baryp, mádeni nysandardy aralady. Sonymen qatar oblysymyzdyń 520 oqýshysy respýblikalyq olimpiadalarda baq synap, onyń 200-ge jýyǵy júldeli oryndardy ielendi. Bul jetistikter – bilim salasyna jasalǵan júieli qoldaýdyń nátijesi. Aldaǵy ýaqytta da balalarǵa qolaily jaǵdai jasaý baǵytyndaǵy jumystar jalǵasa beredi. Sizderdiń árbir kúnderińiz baqytqa, al armandaryńyz jarqyn jetistikterge toly bolsyn. Jańa jyldaryńyz qutty bolsyn, qymbatty balalar! – dedi Darhan Satybaldy.
Merekelik jiynda áleýmettik osal toptaǵy balalar men respýblikalyq, halyqaralyq olimpiada jeńimpazy bolǵan 200 balaǵa syilyqtar tartý etilip, estelik hattar men túrli táttiler úlestirildi. Sondai-aq ár búldirshinge oqý quraldaryna arnalǵan sómke, qazaq ertegi kitaptary berilip, aqshalai syiaqy tabystaldy. Qurmetke bólengen oqýshylar arasynda elimizdiń batys óńirlerindegi sý tasqynynan zardap shekken halyqqa óziniń jinap júrgen qarajatyn joldap, kópshilikti súisindirgen kentaýlyq oqýshy Gaýhar Shaimerden de bar.
Merekelik sharada qazaq ertegileriniń keiipkerleri balalardyń kóńilin kóterdi. Arnaiy kontserttik baǵdarlamada áýelegen án shyrqalyp, myń buralǵan bishiler balalarǵa erekshe áser syilady.
Aita keteiik, Jańa jyl merekesine deiin 200 bala 1 kún boiy Túrkistannyń kórikti oryndaryn aralady. Balalarǵa arnalǵan oiyn-saýyq ortalyǵynda ýaqytty qyzyqty ótkizip, kinoteatrda mýltfilm tamashalady.
