Pýtinniń kómekshisi Iýrii Ýshakov Qazaqstan 2025 jyly 1 qańtardan bastap BRIKS-ke qosylatynyn aitty, - dep habarlaidy Dalanews.kz.
Ýshakovtyń sózinshe, Qazanda ótken sammittiń mańyzdy nátijeleriniń biri – BRIKS seriktes elderiniń sanatynyń qurylýy jáne 13 memlekettiń tiziminiń kelisilgeni boldy.
«… Qazir Belarýs, Boliviia, Indoneziia, Qazaqstan, Kýba, Malaiziia, Ózbekstan, Tailand, Ýganda elderinen rastama alyndy. Olar 2025 jylǵy 1 qańtardan bastap resmi túrde BRIKS-tiń seriktes memleketteri bolady», – dedi Ýshakov.
Eske salaiyq, buǵan deiin Prezidenttiń keńesshisi - Prezidenttiń Baspasóz hatshysy Berik Ýáli Prezidentke Qazaqstannyń BRIKS qurylymyna kirý múmkindigin qarastyrý týraly usynystar túskenin aitqan edi.
Memleket basshysy bul usynysty Qazaqstannyń ulttyq múddesi turǵysynan muqiiat qarastyrýda.
Qazandaǵy jiynǵa qonaq retinde shaqyrylǵan Toqaev búgin outreach formatyndaǵy keńeitilgen quramda ótetin jiynynda sóz sóileidi.
"Elimiz qurylymǵa múshe bolýǵa jáne osy birlestiktiń damý perspektivalaryna qatysty basqa da máselelerdi qaraýdyń kóp satyly protsesin eskere otyryp, qazir jáne jaqyn bolashaqta BRIKS-ke múshe bolýǵa ótinish berýden qalys qalady.
Prezident buǵan deiin birneshe ret BUU-ny álemdegi ámbebap ári balamasy joq uiym retinde ataǵan bolatyn. Sondai-aq osy Uiymda barlyq ózekti halyqaralyq problemalardy, sonyń ishinde ádiletti álemdik tártip qurýǵa qatysty máselelerdi talqylaý kerek degen ustanymyn bildirgeni jurtshylyqqa málim.
Prezidenttiń pikirinshe, BUU da kemshiliksiz emes. Biraq dál sondai basqa uiym joq. Sondyqtan BUU-ǵa álemdik qaýymdastyqtyń qoldaýy aýadai qajet. BUU Jarǵysy halyqaralyq quqyqtyń negizi bolýy kerek jáne bul irgeli qujatta bekitilgen qaǵidalardy buzýǵa eshkimniń qaqysy joq.
Memleket basshysy "orta derjavalardyń" múddelerin eskere otyryp, BUU-ǵa múshe memleketterdiń keń aýqymdy konsýltatsiialary negizinde BUU Qaýipsizdik Keńesin reformalaýdy bastaý qajet dep esepteidi", - degen edi Berik Ýáli óz sózinde.
Aita keteiik, BRIKS (Braziliia, Resei, Úndistan, Qytai jáne Ońtústik Afrika) – bul damýshy naryqtarǵa ie elderden qurylǵan ekonomikalyq jáne saiasi yntymaqtastyq uiymy. Alǵashynda 2000 jyldardyń basynda BRIK (Braziliia, Resei, Úndistan jáne Qytai) retinde qalyptasyp, 2010 jyly Ońtústik Afrika qosylǵannan keiin BRIKS ataýyn aldy.
