Áleýmettik medısınalyq saqtandyrý qorynda derbes tóleýshiler men jeke kásipkerler úshin jarnalardy esepteý negizi retinde eń tómengi jalaqy esepke alynady. 2025 jyly onyń mólsheri sol kúıinde qalady – 85 000 teńge. Demek, jarnalar mólsheri de ózgermeıdi. Jumys berýshiler men jumysshylar úshin stavkalar da ózgerissiz qalady – sáıkesinshe 3% jáne 2%.
"Tek birjolǵy tólem mólsheri ózgeredi – 21,5%-dan 23,8%-ǵa deıin, sondaı-aq jeńildetilgen kategorıadaǵy azamattar úshin memleket tarapynan jarnalar mólsheri ózgeredi – ortasha aılyq jalaqynyń 1,9%-ynan 2%-yna deıin, bul kórsetkish ótken eki jyldaǵy aǵymdaǵy qarjy jylynyń ortasha aılyq jalaqysynan esepteledi. Bul málimetti memlekettik statısıka salasyndaǵy ýákiletti organ anyqtaıdy. Qazaqstan Respýblıkasy Ulttyq statısıka búrosynyń málimeti boıynsha, 2023 jyldyń qorytyndysy boıynsha Qazaqstan Respýblıkasynyń ortasha aılyq jalaqysy 364 295 teńgeni qurady, delingen resmı habarlamada.
Osylaısha, 2025 jyly MÁMS tólemderiniń mólsheri kelesideı bolady:
- Jumys berýshilerdiń jarnalary – qyzmetkerdiń tabysynan 3%;
- Jumysshylardyń jarnalary – tabystyń 2%-y;
- Birjolǵy tólem tóleýshiler – jalaqy qorynan 23,8%;
- Azamattyq-quqyqtyq sharttar boıynsha jumys isteıtin jeke tulǵalardyń jarnalary – tabystyń 2%-y;
- Jeke kásipkerlerdiń, jeke praktıkamen aınalysatyn tulǵalardyń jarnalary – 5 950 teńge (AEK-tiń 1,4 eselengen mólsheriniń 5%-y, sáıkes qarjy jylynyń respýblıkalyq búdjet zańymen bekitilgen);
- Derbes tóleýshilerdiń jarnalary – 4 250 teńge (AEK-tiń 5%-y);
- Memleket tarapynan MÁMS-ke tólenetin jarnalar – 7 285,9 teńge.
MÁMS jarnalaryn "Qazposhta" AQ, ekinshi deńgeıli bankterdiń kasalary men mobıldi qosymshalary, sondaı-aq termınaldar arqyly tóleýge bolady.
Eske salaıyq, MÁMS júıesindegi mártebeni kelesi joldarmen tekserýge bolady:
- Telegram-bot (https://t.me/SaqtandyryBot)
- Qoldau 24/7 mobıldi qosymshasy
- Keıbir ekinshi deńgeıli bankterdiń mobıldi qosymshalary
- egov.kz elektrondy úkimet saıtynyń "Medısınalyq qyzmetterdi tutynýshy retinde qatysý jáne mindetti áleýmettik medısınalyq saqtandyrý júıesindegi tólemder men jarnalar týraly aqparat berý" memlekettik qyzmeti arqyly.
