Reseı Federasıasy Qazaqstannan jetkizilgen iri kólemdegi azyq-túlik ónimderin shekarada ótkizbeı, keri qaıtardy, dep habarlaıdy Dala News.
Reseıdiń veterınarlyq jáne fıtosanıtarlyq baqylaý qyzmetiniń Ýral óńiraralyq basqarmasynyń málimetinshe, 2026 jylǵy 13-19 sáýir aralyǵynda Chelábi oblysyndaǵy Qazaqstanmen shekaralas «Býgrıstoe» jáne «Nıkolaevka» avtomobıldik ótkizý beketterinde táýlik boıy baqylaý júrgizilgen.
Tekserý nátıjesinde Qazaqstannan Reseıge baǵyttalǵan janýar tektes ónimderdiń iri partıasy talaptarǵa sáıkes kelmeıtini anyqtalǵan. Atap aıtqanda, 12 júk kóligimen tasymaldanǵan jalpy salmaǵy 279,3 tonna bolatyn balmuzdaq pen ıogýrt turaqtandyrǵyshy el aýmaǵyna kirgizilmegen.
Inspektorlardyń aıtýynsha, negizgi sebep – veterınarlyq ilespe qujattardaǵy olqylyqtar. Qujattarda ónimniń naqty qaı óndiris ornynan shyqqany kórsetilmegen. Bul ónimniń tolyq qadaǵalanýyn, ıaǵnı onyń shyǵý tegi men qaýipsizdigin baqylaýdy múmkin emes etedi. Osyǵan baılanysty júk Reseı aýmaǵyna jiberilmeı, keri qaıtarylǵan.
Sonymen qatar sol kezeńde Ózbekstannan jetkizilgen 1 728 ara paketi de Reseıge kirgizilmegen. Bul jaǵdaıda da veterınarlyq qujattar talaptarǵa saı bolmaǵany anyqtalǵan.
Budan bólek, keri baǵyttaǵy tasymaldaýda da zańbuzýshylyqtar tirkelgen. Reseıden Qazaqstanǵa jóneltilgen 2,5 tonna muzdatylǵan teńiz balyǵy shekarada toqtatylǵan. Tekserý barysynda bul ónimdi jóneltken kásiporyndardyń Eýrazıalyq ekonomıkalyq odaqtyń tıisti reestrine engizilmegeni belgili bolǵan. Iaǵnı, olar mundaı ónimdi eksporttaýǵa quqyǵy joq bolyp shyqqan. Osyǵan baılanysty júk zań talaptaryna sáıkes keri qaıtarylǵan.
Reseı tarapy mundaı sharalar ónim qaýipsizdigin qamtamasyz etý jáne veterınarlyq talaptardyń saqtalýyn baqylaý maqsatynda qabyldanatynyn atap ótti.
Aıta keteıik, Eýrazıalyq ekonomıkalyq odaq aıasynda azyq-túlik ónimderin tasymaldaý kezinde ónimniń shyǵý tegi, qaýipsizdigi jáne óndirýshi kásiporyn týraly tolyq ári naqty aqparattyń bolýy mindetti talap bolyp sanalady. Qujattaǵy kez kelgen sáıkessizdik ónimniń shekaradan ótpeýine negiz bola alady.
