Qazaqstanda Telegram arqyly «ońai aqsha tabý» usynatyn arnalar kóbeiip barady. Dala News redaktsiiasy osyndai usynystardyń birin tekserip kórdi.
Biz «Fariza TABYS TABÝ» atty Telegram-arnaǵa jazylyp, ondaǵy usynylǵan shemanyń qalai jumys isteitinin tájiribe júzinde baqyladyq. Arnada qoldanýshylarǵa az qarajat salyp, qysqa ýaqytta birneshe ese kóbeitip alýǵa bolatyny aitylǵan.
Ózin Fariza dep tanystyrǵan akkaýnt bizge jeke hat jazyp, tabys tabý jolyn túsindirdi. Onyń aitýynsha, shema óte qarapaiym: aldymen belgili bir somany (mysaly, 5000 teńge) jiberý qajet, keiin ol aqsha «kazino nemese kriptovaliýta arqyly arnaiy tásilmen kóbeitiledi».
«3) 5000 teńgemen 20 minýt oinap 360-400 myń kóteremin (kazinoda 100% utýǵa bolatyn arnaiy shemalarmen)», – delingen habarlamalardyń birinde.
Sondai-aq, qoldanýshyǵa «100% garantiia» beriletini birneshe ret qaitalanady. Aqsha aýdarylǵan soń chek jiberý talap etiledi, al keiin «daiyn bolǵanda» iri soma qaitarylady degen ýáde beriledi.
Redaktsiia bul usynystyń qanshalyqty shynaiy ekenin tekserý maqsatynda dialogty jalǵastyrdy. Alaida shemaǵa qatysty naqty dálelder, litsenziia, kelisimshart nemese qandai da bir resmi qujat usynylmady. Barlyq senim tek ýáde men sózge negizdelgen.
Arnada «klientterdiń alǵystary» men túrli skrinshottar jariialanǵanymen, olardyń shynaiylyǵyn rastaý múmkin emes. Sonymen qatar, habarlamalarda dini tirkester jii qoldanylyp, bul arqyly aýditoriianyń senimin arttyrýǵa tyrysatyny baiqalady.
Mundai tásilder qarjylyq alaiaqtyqqa tán belgilerdiń biri sanalady. Sarapshylardyń aitýynsha, «100 paiyz kepildik», «qysqa ýaqytta úlken tabys» jáne «arnaiy shema» degen ýádeler kóbine jalǵan bolady.
Redaktsiia júrgizgen tájiribe nátijesinde usynylǵan júieniń qaýipsizdigi men zańdylyǵyna qatysty naqty aiǵaqtar anyqtalǵan joq. Aqshany beitanys tulǵalardyń jeke esepshottaryna aýdarý táýekeli joǵary.
Qazaqstan zańnamasyna sáikes, mundai áreketter alaiaqtyq retinde baǵalanýy múmkin.
Redaktsiia oqyrmandarǵa kúmándi qarjylyq usynystarǵa saq bolýdy jáne qarajatty tek resmi, tekserilgen platformalar arqyly ǵana aýdarýdy eskertedi.
Redaktsiia bul derekke qatysty quzyrly organdarǵa resmi saýal joldady. Jaýap alynǵannan keiin qosymsha aqparat jariialanatyn bolady.
