قازاقستاندا Telegram ارقىلى «وڭاي اقشا تابۋ» ۇسىناتىن ارنالار كوبەيىپ بارادى. Dala News رەداكسياسى وسىنداي ۇسىنىستاردىڭ ءبىرىن تەكسەرىپ كوردى.
ءبىز «فاريزا تابىس تابۋ» اتتى Telegram-ارناعا جازىلىپ، ونداعى ۇسىنىلعان سحەمانىڭ قالاي جۇمىس ىستەيتىنىن تاجىريبە جۇزىندە باقىلادىق. ارنادا قولدانۋشىلارعا از قاراجات سالىپ، قىسقا ۋاقىتتا بىرنەشە ەسە كوبەيتىپ الۋعا بولاتىنى ايتىلعان.
ءوزىن فاريزا دەپ تانىستىرعان اككاۋنت بىزگە جەكە حات جازىپ، تابىس تابۋ جولىن ءتۇسىندىردى. ونىڭ ايتۋىنشا، سحەما وتە قاراپايىم: الدىمەن بەلگىلى ءبىر سومانى (مىسالى، 5000 تەڭگە) جىبەرۋ قاجەت، كەيىن ول اقشا «كازينو نەمەسە كريپتوۆاليۋتا ارقىلى ارنايى تاسىلمەن كوبەيتىلەدى».
«3) 5000 تەڭگەمەن 20 مينۋت ويناپ 360-400 مىڭ كوتەرەمىن (كازينودا 100% ۇتۋعا بولاتىن ارنايى سحەمالارمەن)»، – دەلىنگەن حابارلامالاردىڭ بىرىندە.
سونداي-اق، قولدانۋشىعا «100% گارانتيا» بەرىلەتىنى بىرنەشە رەت قايتالانادى. اقشا اۋدارىلعان سوڭ چەك جىبەرۋ تالاپ ەتىلەدى، ال كەيىن «دايىن بولعاندا» ءىرى سوما قايتارىلادى دەگەن ۋادە بەرىلەدى.
رەداكسيا بۇل ۇسىنىستىڭ قانشالىقتى شىنايى ەكەنىن تەكسەرۋ ماقساتىندا ديالوگتى جالعاستىردى. الايدا سحەماعا قاتىستى ناقتى دالەلدەر، ليسەنزيا، كەلىسىمشارت نەمەسە قانداي دا ءبىر رەسمي قۇجات ۇسىنىلمادى. بارلىق سەنىم تەك ۋادە مەن سوزگە نەگىزدەلگەن.
ارنادا «كليەنتتەردىڭ العىستارى» مەن ءتۇرلى سكرينشوتتار جاريالانعانىمەن، ولاردىڭ شىنايىلىعىن راستاۋ مۇمكىن ەمەس. سونىمەن قاتار، حابارلامالاردا ءدىني تىركەستەر ءجيى قولدانىلىپ، بۇل ارقىلى اۋديتوريانىڭ سەنىمىن ارتتىرۋعا تىرىساتىنى بايقالادى.
مۇنداي تاسىلدەر قارجىلىق الاياقتىققا ءتان بەلگىلەردىڭ ءبىرى سانالادى. ساراپشىلاردىڭ ايتۋىنشا، «100 پايىز كەپىلدىك»، «قىسقا ۋاقىتتا ۇلكەن تابىس» جانە «ارنايى سحەما» دەگەن ۋادەلەر كوبىنە جالعان بولادى.
رەداكسيا جۇرگىزگەن تاجىريبە ناتيجەسىندە ۇسىنىلعان جۇيەنىڭ قاۋىپسىزدىگى مەن زاڭدىلىعىنا قاتىستى ناقتى ايعاقتار انىقتالعان جوق. اقشانى بەيتانىس تۇلعالاردىڭ جەكە ەسەپشوتتارىنا اۋدارۋ تاۋەكەلى جوعارى.
قازاقستان زاڭناماسىنا سايكەس، مۇنداي ارەكەتتەر الاياقتىق رەتىندە باعالانۋى مۇمكىن.
رەداكسيا وقىرماندارعا كۇماندى قارجىلىق ۇسىنىستارعا ساق بولۋدى جانە قاراجاتتى تەك رەسمي، تەكسەرىلگەن پلاتفورمالار ارقىلى عانا اۋدارۋدى ەسكەرتەدى.
رەداكسيا بۇل دەرەككە قاتىستى قۇزىرلى ورگاندارعا رەسمي ساۋال جولدادى. جاۋاپ الىنعاننان كەيىن قوسىمشا اقپارات جاريالاناتىن بولادى.
