Resei 1 mamyrdan bastap Qazaqstan munaiyn Germaniiaǵa Drýjba munai qubyry arqyly jetkizýdi toqtatýdy josparlap otyr. Bul týraly Reuters agenttigi salalyq úsh derekkózge silteme jasap habarlady, dep habarlaidy Dalanews.kz.
Agenttik málimetinshe, jańartylǵan jetkizý kestesi Qazaqstan men Germaniiaǵa jiberilgen. Derekkózder bul aqparatty jasyryn túrde rastaǵan.
Habarlamada Resei men Germaniia arasyndaǵy saiasi jáne iskerlik qarym-qatynastar Ýkrainadaǵy soǵys aiasynda nasharlaǵany aitylǵan. Berlin Kievti qoldaidy.
Resei Energetika ministrligi Reuters saýalyna birden jaýap bermegen. Al Kremldiń baspasóz hatshysy Dmitrii Peskov mundai josparlar týraly bilmeitinin málimdedi.
«Biz muny tekserýge tyrysamyz», – dedi ol brifing barysynda.
Reuters dereginshe, 2022 jyly Germaniia Rosneft kompaniiasynyń eldegi bólimshelerin syrtqy basqarýǵa bergen. Bul Máskeý men Berlin arasyndaǵy uzaq jylǵy energetikalyq bailanystardyń úzilýine ákelgen.
2025 jyly Qazaqstan munaiynyń Germaniiaǵa eksport kólemi 2,146 mln tonnany nemese táýligine shamamen 43 myń barreldi quraǵan. Bul 2024 jylmen salystyrǵanda 44%-ǵa kóp.
Jetkizilimder «Drýjbanyń» Polsha arqyly ótetin soltústik tarmaǵy arqyly júzege asyrylady. Alaida sońǵy ýaqytta Resei aýmaǵyndaǵy qubyr infraqurylymyna jasalǵan dron shabýyldary saldarynan tasymaldaý birneshe ret buzylǵan.
Atalǵan baǵyt boiynsha munaidyń bir bóligin Germaniiadaǵy iri munai óńdeý zaýyttarynyń biri – Shvedt qalasyndaǵy PCK zaýyty alady. Bul kásiporyn 2022 jyly Resei munaiynan bas tartqannan keiin Qazaqstan munaiyna kóshken.
