Qazaqstan kóshi-qon saıasatyn jańartyp, elge joǵary bilikti mamandar men ınvestorlardy tartýǵa basymdyq berip otyr, dep habarlaıdy Dala News.
Bul týraly búgin vıse-premer – Mádenıet jáne aqparat mınıstri Aıda Balaeva málimdedi.
Mınıstrdiń aıtýynsha, 2026 jylǵy 10 sáýirden bastap shetel azamattaryn turaqty turýǵa qabyldaý tártibine qatysty jańa erejeler kúshine engen. Bul ózgerister eldiń adamı kapıtal sapasyn arttyrýǵa jáne suranysqa ıe mamandardy tartýǵa baǵyttalǵan.
Qazaqstanda ınvestorlar úshin jeńildetilgen vızalyq rejım saqtalady. Olarǵa ınvestısıalyq jobalarǵa qatysatyn basshylar men olardyń otbasy músheleri úshin arnaıy vızalar beriledi. Bul el ekonomıkasyna erkin kirip, bıznes júrgizýge jáne jańa jumys oryndaryn ashýǵa múmkindik beredi.
Sonymen qatar, tapshy mamandyq ıelerin tartýǵa erekshe nazar aýdarylyp otyr.
Aıda Balaevanyń aıtýynsha, arnaıy vızalar men turaqty turýǵa múmkindik beretin sanattar neırohırýrgtar, gematologtar, farmasevtıkalyq ınjener-tehnologtar, bakterıologtar, grafıkalyq anımasıa mamandary sıaqty suranysqa ıe kásip ıelerine qarastyrylǵan.
Jalpy tizimge 51 mamandyq engizilgen jáne ol turaqty túrde jańartylyp otyrady. Bul tizim el ekonomıkasynyń qajettiligine qaraı ózgerip otyrady. Kelesi jańartý 2030 jylǵa deıingi kóshi-qon saıasaty tujyrymdamasy aıasynda jyl sońyna deıin júzege asyrylady.
Sonymen qatar jańa vıza túrleri engizilýde.
Mınıstrdiń aıtýynsha, joǵary bilikti mamandar men sıfrlyq kóshpendilerge arnalǵan jańa vızalyq sanattar jahandyq talanttar men zamanaýı tehnologıalardy tartýǵa múmkindik beredi.
Sondaı-aq memlekettik organdardyń usynysy negizinde shetel azamattaryn jeńildetilgen tártippen elge kirgizý tetigi qarastyrylǵan.
Resmı málimetke sáıkes, bul sharalar memleket, bıznes jáne qoǵam múddeleriniń teńgerimin saqtaı otyryp, Qazaqstannyń ashyq ári zamanaýı kóshi-qon saıasatyn qalyptastyrýǵa baǵyttalǵan.
Aıta keteıik, 20 sáýir kúni Úkimet basshysy Oljas Bektenov quqyq buzýshylyqtardyń aldyn alý jónindegi vedomstvoaralyq komısıa otyrysyn ótkizip, eldegi kóshi-qon jaǵdaıyn jáne ony retteý sharalaryn qarastyrǵan bolatyn.
