قازاقستان كوشى-قون ساياساتىن جاڭارتىپ، ەلگە جوعارى بىلىكتى ماماندار مەن ينۆەستورلاردى تارتۋعا باسىمدىق بەرىپ وتىر، دەپ حابارلايدى Dala News.
بۇل تۋرالى بۇگىن ۆيسە-پرەمەر – مادەنيەت جانە اقپارات ءمينيسترى ايدا بالايەۆا مالىمدەدى.
ءمينيستردىڭ ايتۋىنشا، 2026 جىلعى 10 ساۋىردەن باستاپ شەتەل ازاماتتارىن تۇراقتى تۇرۋعا قابىلداۋ تارتىبىنە قاتىستى جاڭا ەرەجەلەر كۇشىنە ەنگەن. بۇل وزگەرىستەر ەلدىڭ ادامي كاپيتال ساپاسىن ارتتىرۋعا جانە سۇرانىسقا يە مامانداردى تارتۋعا باعىتتالعان.
قازاقستاندا ينۆەستورلار ءۇشىن جەڭىلدەتىلگەن ۆيزالىق رەجيم ساقتالادى. ولارعا ينۆەستيسيالىق جوبالارعا قاتىساتىن باسشىلار مەن ولاردىڭ وتباسى مۇشەلەرى ءۇشىن ارنايى ۆيزالار بەرىلەدى. بۇل ەل ەكونوميكاسىنا ەركىن كىرىپ، بيزنەس جۇرگىزۋگە جانە جاڭا جۇمىس ورىندارىن اشۋعا مۇمكىندىك بەرەدى.
سونىمەن قاتار، تاپشى ماماندىق يەلەرىن تارتۋعا ەرەكشە نازار اۋدارىلىپ وتىر.
ايدا بالايەۆانىڭ ايتۋىنشا، ارنايى ۆيزالار مەن تۇراقتى تۇرۋعا مۇمكىندىك بەرەتىن ساناتتار نەيروحيرۋرگتار، گەماتولوگتار، فارماسيەۆتيكالىق ينجەنەر-تەحنولوگتار، باكتەريولوگتار، گرافيكالىق انيماسيا ماماندارى سياقتى سۇرانىسقا يە كاسىپ يەلەرىنە قاراستىرىلعان.
جالپى تىزىمگە 51 ماماندىق ەنگىزىلگەن جانە ول تۇراقتى تۇردە جاڭارتىلىپ وتىرادى. بۇل ءتىزىم ەل ەكونوميكاسىنىڭ قاجەتتىلىگىنە قاراي وزگەرىپ وتىرادى. كەلەسى جاڭارتۋ 2030 جىلعا دەيىنگى كوشى-قون ساياساتى تۇجىرىمداماسى اياسىندا جىل سوڭىنا دەيىن جۇزەگە اسىرىلادى.
سونىمەن قاتار جاڭا ۆيزا تۇرلەرى ەنگىزىلۋدە.
ءمينيستردىڭ ايتۋىنشا، جوعارى بىلىكتى ماماندار مەن سيفرلىق كوشپەندىلەرگە ارنالعان جاڭا ۆيزالىق ساناتتار جاھاندىق تالانتتار مەن زاماناۋي تەحنولوگيالاردى تارتۋعا مۇمكىندىك بەرەدى.
سونداي-اق مەملەكەتتىك ورگانداردىڭ ۇسىنىسى نەگىزىندە شەتەل ازاماتتارىن جەڭىلدەتىلگەن تارتىپپەن ەلگە كىرگىزۋ تەتىگى قاراستىرىلعان.
رەسمي مالىمەتكە سايكەس، بۇل شارالار مەملەكەت، بيزنەس جانە قوعام مۇددەلەرىنىڭ تەڭگەرىمىن ساقتاي وتىرىپ، قازاقستاننىڭ اشىق ءارى زاماناۋي كوشى-قون ساياساتىن قالىپتاستىرۋعا باعىتتالعان.
ايتا كەتەيىك، 20 ءساۋىر كۇنى ۇكىمەت باسشىسى ولجاس بەكتەنوۆ قۇقىق بۇزۋشىلىقتاردىڭ الدىن الۋ جونىندەگى ۆەدومستۆوارالىق كوميسسيا وتىرىسىن وتكىزىپ، ەلدەگى كوشى-قون جاعدايىن جانە ونى رەتتەۋ شارالارىن قاراستىرعان بولاتىن.
