Qazaqstandyq prodiýser Baian Alagózova “Qyz Jibek” filmindegi keiipkerdiń kamzolyna qatysty daýǵa pikir bildirdi dep habarlaidy Dalanews.kz.
Bul oqiǵa qoǵamda keń rezonans týdyrǵan bolatyn. Qazirgi ýaqytta prodiýser Ystambulda júr.
Alagózova áleýmettik jelidegi paraqshasynda jaǵdaiǵa qatysty óz oiyn ashyq jetkizgen.
“Ulttyq qundylyq sanalatyn “Qyz Jibek” kamzoly oligarhtyń áieliniń qolyna ótip ketipti degen aiyp taǵylyp jatyr. Sóitsem, meniń endi atym da, ataǵym da, el mádenieti men ónerine sińirgen eńbegim de joq bolyp shyqty. Sondyqtan, divanda otyryp pikir jazatyn jýrnalister, aldymen “oligarh” degenniń ne ekenin qarap alyńyzdar. Meniń kúieýim oligarh emes, el qazynasyna qomaqty salyq tóleitin adal kásipker”, – dedi ol.
Prodiýserdiń sózinshe, kamzolǵa ondaǵan jyl boiy eshkim nazar aýdarmaǵan.
“Búkil eldi shýlatpas buryn, ózderińiz aityp otyrǵan mádeni shokqa qarańyzdar. Nege 50 jyldan astam ýaqyt bul kamzol eshkimge kerek bolmady? Nege eshkim onyń qaida ekenin suramady? Uly filmniń kostiýmderin kim saqtady? Eshkim saqtaǵan joq! Ony qoqysqa tastatpai, bir uly áiel ǵana aman alyp qaldy. 30 jyl buryn Qazaqstandaǵy birde-bir basshylyq “Qyz Jibek” filminiń kostiýmderi qaida dep suramady. Sebebi ol eshkimge qajet bolmady. Al qazir qujat boiynsha joiylyp ketken, áldeqashan qoqysqa ainalýy tiis kamzol báriniń kómeiine keptelgendei boldy”, – dep ashýlandy Alagózova.
Onyń aitýynsha, kamzoldy oǵan buryn qoimada jumys istegen áiel syilaǵan.
“Bul kostiým eshkimge tiesili emes, eshbir qujatta tirkelmegen. Ony álgi áiel úiinde saqtap kelgen. Keiin ony senimdi qolǵa bergisi keldi. Jylyna 30 adam ǵana baratyn mýzeige emes. “Qazaqfilm” mýzeiine qansha adam barady? Onda qandai kostiýmder baryn bilesizder me? Al men bul kamzoldy damytamyn. Erteń onyń 600 kóshirmesin tiktirip, ár adam onyń “Qyz Jibek” kamzoly ekenin biletin bolady. Mende ondai ideia burynnan bar edi”, – dedi ol.
Prodiýser bul buiymdy keńinen nasihattaýdy kózdeitinin aitty.
“Bul kamzoldyń “Qazaqfilmge” nemese basqa bireýge tiesili ekenin dáleldeitin birde-bir qujat joq. Sondyqtan bul – meniń kamzolym ekenin moiyndaý kerek. Men ony barynsha dáriptep, uly sýretshi Gúlfairýs Ysmaiylova jasaǵan sulýlyqty halyqqa tanytamyn”, – dedi Alagózova.
Sonymen qatar, ol aldaǵy josparyn da bólisti.
“Órkenietti elderde kez kelgen adam uly tulǵalarǵa tiesili zattardy satyp alyp, ielik ete alady. Aitpaqshy, meniń garderobymda uly Roza Baǵlanovanyń kostiými bar. Endi soǵan da aiyp taǵasyzdar ma? Aldaǵy ýaqytta da uly áielderdiń kostiýmderin satyp alǵym keledi. Roza Rymbaevadan da satyp alýdy josparlap otyrmyn. Bul – meniń jeke qalaýym”, – dep túiindedi prodiýser.
Eske salaiyq, áleýmettik jelide prodiýser Baian Alagýzova jariialaǵan jazbadan keiin «Qyz Jibek» filmindegi kostiýmge qatysty jaǵdai tekserilip jatqany habarlanǵan bolatyn.
