پەتروپاۆلدا «قىزىلجار» فۋتبول كلۋبىنىڭ جاڭا باسشىلىعى مەن ءقازىر قازاقستان ۇلتتىق قۇراماسىنىڭ باس باپكەرى قىزمەتىن اتقارىپ جۇرگەن ءالي الييەۆ اراسىنداعى سوت داۋى جالعاسىپ جاتىر، دەپ حابارلايدى Dalanews.kz Orda.kz-كە سىلتەپ.
باپكەر كلۋبتان جالپى سوماسى 201 ميلليون تەڭگە ءوندىرۋدى تالاپ ەتۋدە. بۇل سوماعا سىياقىلار، جالاقى بويىنشا بەرەشەك پەن ەڭبەك كەلىسىمشارتىن بۇزۋ ءۇشىن وتەماقى كىرەدى.
قايشىلىق نەدەن باستالدى؟
بۇرىنعى باس باپكەردىڭ ايلىعى باستاپقىدا 1 ملن تەڭگە بولۋى ءتيىس ەدى. الايدا كلۋبتاعى باسقارۋ اۋىسقاننان كەيىن انىقتالعانداي، وعان ايىنا 10 ملن تەڭگە تولەنىپ كەلگەن. بۇل قاراجات زاڭسىز ەڭبەك شارتى نەگىزىندە اۋدارىلعان.
پەتروپاۆلدىڭ ازاماتتىق ىستەر جونىندەگى سوتى كلۋبتىڭ تالاپ-ارىزىن قاناعاتتاندىرىپ، تىركەلمەگەن كەلىسىمشارتتى زاڭسىز دەپ تانىدى. الييەۆكە 2024 جىل بويىنشا جالاقىنى قايتا ەسەپتەۋ ۇسىنىلعان. الايدا ول بۇل تالاپپەن كەلىسپەي، 2025 جىلدىڭ 9 قاڭتارىندا قازاقستان فۋتبول فەدەراسياسىنىڭ داۋلاردى شەشۋ پالاتاسىنا جۇگىنىپ، تومەندەگى سومالاردى ءوندىرىپ بەرۋدى سۇراعان:
- ەڭبەك شارتىن بۇزعانى ءۇشىن وتەماقى – 120 ملن تەڭگە
- 2024 جىلدىڭ قىركۇيەك–جەلتوقسان ايلارى اراسىنداعى جالاقى قارىزى – 40 ملن تەڭگە
- تۋرنيرلىك كەستەدەگى بەسىنشى ورىن ءۇشىن – 20 ملن تەڭگە
- چەمپيوناتتاعى 11 جەڭىس ءۇشىن – 11 ملن تەڭگە
- ەڭبەك شارتىنا قول قويعانى ءۇشىن جەكە بونۋس – 10 ملن تەڭگە
الايدا كلۋب اتالعان وتەماقى مەن قارىز بويىنشا تولەمدەردى تولەۋدەن باس تارتاتىنىن رەسمي تۇردە مالىمدەگەن. سوت ماتەريالىندا الييەۆ قوسىمشا كەلىسىمدەر بويىنشا قارىزدى وتەۋ كەستەسىن بەكىتۋدى سۇراعانى دا كورسەتىلگەن.
سوت شەشىمى جانە ءمينيستردىڭ پىكىرى
پەتروپاۆل قالاسىنىڭ №2 سوتىنىڭ شەشىمى وزگەرىسسىز قالدىرىلىپ، ءالي الييەۆتىڭ شاعىمى قاناعاتتاندىرىلمادى.
بۇل جاعدايعا پىكىر بىلدىرگەن تۋريزم جانە سپورت ءمينيسترى ەربول مىرزابوسىنوۆ فۋتبول فەدەراسياسى الييەۆتىڭ ۇستانىمىن قولدايتىنىن، ەندى باپكەردىڭ كاسساسيالىق سوتقا جۇگىنەتىنىن مالىمدەدى.
ال 2025 جىلدىڭ 25 شىلدەسىندە ازاماتتىق سوت جاڭا شەشىم شىعاردى:
«قىزىل-جار سك» ءجشس-نىڭ ءالي الييەۆكە قارسى تالاپ-ارىزى قاناعاتتاندىرىلىپ، 2022–2023 جىلدارداعى ەكى قوسىمشا كەلىسىم زاڭسىز دەپ تانىلدى. سونداي-اق، سوت شەشىمىمەن ءالي الييەۆ كلۋبتىڭ وكىلىنىڭ قىزمەتى ءۇشىن 1 ملن تەڭگە وندىرۋگە مىندەتتەلدى. بۇل شەشىم ازىرگە زاڭدى كۇشىنە ەنگەن جوق.
كلۋبتىڭ قازىرگى جاعدايى
«قىزىلجار» – قازاقستانداعى ەڭ اۋقاتتى بەس كلۋبتىڭ ءبىرى. 2025 جىلعى بيۋدجەتى 2 ملرد تەڭگەنى قۇرايدى، قۇرامىندا 11 لەگيونەر بار.
سوعان قاراماستان، كلۋب پرەمەر-ليگادا قالۋ ءۇشىن كۇرەسىپ جاتىر. سوڭعى ويىنداردا كوماندا تاعى جەڭىلىسكە ۇشىرادى. الدا ءالى توعىز ماچ بار، ءبىراق جانكۇيەرلەر كومانداعا سەنۋدەن قالعانداي.
