ارالاس جەكپە-جەك شەبەرى شاۆكات راحمونوۆتىڭ ايەلى مەن ۇلى جول اپاتىنا ءتۇستى، دەپ حابارلايدى Dalanews.kz.
جەلىدە شاۆكات راحمونوۆتىڭ ايەلى مەن ۇلى قاتىسقان جول اپاتى تۋرالى اقپارات تارادى. جامبىل وبلىسىنىڭ پوليسەيلەرى جاعدايعا قاتىستى تۇسىنىكتەمە بەردى، الايدا ناقتى ەسىمدەردى اتامادى.
قۇقىق قورعاۋ ورگاندارىنىڭ مالىمەتىنشە، جول-كولىك وقيعاسى 27 شىلدە كۇنى ساعات 08:50-دە رەسپۋبليكالىق ماڭىزداعى "الماتى – ەكاتەرينبۋرگ" تاسجولىنىڭ 299-شاقىرىمىندا بولعان.
"Toyota Land Cruiser 200" ماركالى كولىكتىڭ جۇرگىزۋشىسى قاراعاندى وبلىسى باعىتىنان الماتىعا قاراي كەلە جاتىپ، رولگە يە بولا الماي، كولىكتى اۋدارىپ العان. جول-كولىك وقيعاسى سالدارىنان ەكى ادام قازا تاۋىپ، تاعى ەكەۋى اۋرۋحاناعا جەتكىزىلدى"، – دەلىنگەن پوليسيا تاراتقان حابارلامادا.
Telegram-داعى Halyqstan ارناسىنىڭ دەرەگىنشە، كولىكتى شاۆكات راحمونوۆتىڭ جۇبايى جۇرگىزگەن. اپات سالدارىنان ونىڭ ەكى قۇربىسى قازا تاپقان.
ءقازىر قىلمىستىق كودەكستىڭ "كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ ەرەجەلەرىن بۇزۋى، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ارەكەت" بابى بويىنشا سوتقا دەيىنگى تەرگەۋ باستالدى. كولىك ارنايى تۇراققا قويىلعان.
"زا نامي ۆىەحالي" تەلەگرام ارناسىنىڭ مالىمەتىنشە، قازىرگى تاڭدا تراۆماتولوگيا بولىمىنە جاتقىزىلعان.
"راحمونوۆتار جابىق باس سۇيەك-مي جاراقاتى جانە مي سوعىلۋى دياگنوزىمەن تراۆماتولوگيا بولىمىنە جاتقىزىلدى. جاعدايلارى – ورتاشا اۋىرلىقتا. ءقازىر ولار ءتيىستى مەديسينالىق حاتتاماعا سايكەس ەم قابىلداپ جاتىر"، - دەلىنگەن وبلىستىق دەنساۋلىق ساقتاۋ باسقارماسىنىڭ جاۋابىندا.
