Dalanews.kz تىلشىسىمەن جۇزدەسكەن «جولاۋشىلار تاسىمالى» اق باس ديرەكتورى پيتەر شتۋرم وسى سالاداعى اتقارىلىپ جاتقان جۇمىستى ەگجەي-تەگجەيلى ايتىپ بەردى.
– پيتەر مىرزا، ءوزىڭىز جاقسى بىلەسىز، حالىقتىڭ ءومىر ءسۇرۋ ساپاسى جاقسارعان سايىن كوڭىلىنەن شىعاتىن ىڭعايلى، جايلى سەرۆيس ىزدەيدى. بۇل قالىپتى جاعداي. اشىعىن ايتايىق، ءبىزدىڭ پويىزدار جايلىلىق تالابىنا ساي كەلە بەرمەيدى. كوپشىلىگىنىڭ سىرت كەيپى دە، ىشكى جاعدايى دا ءماز ەمەس. كەتەۋى كەتكەن كونە ۆاگونداردان قاشان قۇتىلامىز؟ قاراپايىم حالىق قاشان دامىعان شەتەلدەردەگىدەي جاقسى پويىزعا مىنە الادى؟
– اڭگىمەنى باسقاشا باستايىن... قازاقستانعا كەلىپ جۇمىس ىستەۋدەگى ەڭ باستى ماقساتىم تەمىرجول قىزمەتىن جاقسارتۋ ەدى. «جولاۋشىلار تاسىمالىنىڭ» سەرۆيس ساپاسىن ارتتىرىپ، كليەنتتەردىڭ تالاپ-ارىزىنا قۇلاق اساتىن كومپانياعا اينالدىرۋ-تۇعىن.
قىزمەت كورسەتۋ سالاسىنداعى كومپانيا ءبىرىنشى كەزەكتە كليەنتتىڭ قاس-قاباعىن باعىپ، سونىڭ سۇرانىسىنا ساي ارەكەت ەتۋگە ءتيىستى. مۇنسىز جەتىستىك جوق.
تەمىرجول قىزمەتىن قالاي جاقسارتۋعا بولادى؟ ول ءۇشىن كوپ نارسە جاساۋ قاجەت. بۇل وڭاي شارۋا ەمەس. ءسىزدىڭ ايتىپ وتىرعانىڭىز جاڭا ۆاگوندار ساتىپ الۋ عوي.
– ءيا، ماسەلە سول عوي. قاشانعى ەسكى «تەمىردى» مىنە بەرەمىز؟
– ەسكى پويىز پاركىن جاڭارتۋ وتە وزەكتى ماسەلە، ول راس.
جىل باسىنان بەرى «جولاۋشىلار تاسىمالى» اكسيونەرلىك قوعامىندا 2020-2029 جىلدارعا ارنالعان «جىلجىمالى جولاۋشىلار قۇرامىن جاڭارتۋ» ستراتەگياسى جۇزەگە اسىرىلۋدا.
وسى ستراتەگيا شەڭبەرىندە جاڭا جولاۋشىلار ۆاگونىنىڭ 469 بىرلىگىن جانە 26 ۆاگون-ەلەكتر ستانسياسىن ساتىپ الۋ جوسپارلانۋدا.
ساتىپ الىناتىن ۆاگوندارعا قويىلاتىن تالاپتار «Deutsche Bahn»-مەن بىرلەسىپ ازىرلەندى جانە ول حالىقارالىق ستاندارتتارعا سايكەس كەلەدى، ياعني جولاۋشىلاردىڭ بارلىق توپتارى ءۇشىن، ءبىرىنشى كەزەكتە، مۇمكىندىگى شەكتەۋلى ازاماتتار ءۇشىن قولايلى ءارى قولجەتىمدى بولادى.
وسىعان بايلانىستى «تۇلپار» ۆاگون جاساۋ زاۋىتى» ج ش س بازاسىندا ۆاگون ءوندىرىسىن ۇيىمداستىراتىن ستراتەگيالىق ارىپتەستى تارتۋ ماقساتىندا حالىقارالىق كونكۋرس وتكىزىلدى.
اتالعان كونكۋرس ناتيجەلەرى كەلەسى جىلدىڭ قاڭتار ايىنىڭ سوڭىندا جاريالاناتىن بولادى.
ايتا كەتەيىن، بۇعان دەيىن «ترانسماشحولدينگپەن» اراداعى كەلىسىمشارت نەگىزىندە سۋ جاڭا 146 ۆاگون ساتىپ الدىق.
بۇلاردىڭ 50 داناسى كەلەسى جىلدىڭ العاشقى جارتىسىندا ەلگە كەلەدى. بۇدان بولەك، ءالى تولىق قۇراستىرىلماعان 62 تالگو ۆاگونى بويىنشا كەلىسسوز ءجۇرىپ جاتىر. مۇنىڭ ءبارى جۇزەگە اسسا پويىزدارىمىزدىڭ ۇشتەن ەكىسى جاڭارادى. بۇلار جاي ۆاگون ەمەس، ەۋروپاداعىداي ساپاسى سىن كوتەرەتىن، جايلى، قولايلى ۆاگوندار.
ءوزىڭىز بىلەسىز جاڭا ۆاگون ساتىپ الۋ نەمەسە شىعارۋ ءۇشىن قوماقتى ينۆەستيسيا قاجەت. بۇل ماسەلەنى بىردەن شەشە المايمىز. سول ءۇشىن دە بىرنەشە جىلعا ءبولىپ قاراستىرىپ وتىرمىز. جاڭا ۆاگوندارىمىزدىڭ العاشقى دانالارى كەلىپ، تەمىرجولعا شىققاندا، سىزدەردى جولساپارعا شاقىراتىن بولامىز.
– قۋانا-قۋانا كەلەءمىز. دەگەنمەن ءدال ءقازىر تەمىرجولدا جۇرگەن ەسكى ۆاگونداردىڭ ساپاسى سول كۇيىندە قالا بەرە مە؟ جولاۋشىلار 2029 جىلعا دەيىن سول شيقىلداپ-قيقىلداعان پويىزدارمەن جۇرە مە؟
– وتە ورىندى سۇراق قويدىڭىز. ءبىز جاڭا ۆاگون دەپ، ەسكىلەرىن ەلەۋسىز قالدىرمايمىز. سونداي-اق بيىل ستاندارت جولاۋشىلار ۆاگوندارىنداعى سانيتارلىق توراپتاردى (دارەتحانا بولمەلەرىن) اۋىستىرۋ جۇمىستارى باستالدى. بۇل ۆاگونداردىڭ سانيتارلىق-تەحنيكالىق جاعدايىن، جايلىلىق دەڭگەيىن جاقسارتۋعا جانە جولاۋشىلاردىڭ جاقسى اسەر الۋىنا مۇمكىندىك بەرەدى.
جاڭا قابىرعا پانەلدەرى، دارەتحانا، قول جۋعىش، جارىعى، جەلدەتكىشى جانە ت.ب. بار جاڭا سانيتارلىق مودۋلدەردى ورناتۋ پروسەسى باستالدى.
564 ۆاگوننىڭ 1128 سانيتارلىق تورابىن اۋىستىرۋ جوسپارلانۋدا.
جولاۋشىلار وتكەن جىلدىڭ قاراشا ايىنان باستاپ جاڭارتىلعان توسەك-ورىن جابدىقتارىنا ءتيىستى باعا بەردى، سونداي-اق ساپانى باقىلاۋ جۇمىستارىن كۇشەيتۋ ناتيجەسى توسەك-ورىن جابدىقتارىن جۋۋ جانە وڭدەۋ ساپاسىن جاقسارتۋعا ىقپال ەتتى.
اعىمداعى جىلدىڭ شىلدە ايىنان باستاپ ۆاگونداردى جۋىپ، جيناۋ جانە ولاردىڭ سانيتارلىق-گيگيەنالىق قۇرالدارمەن جابدىقتالۋىنا قويىلاتىن تالاپتار قايتا قارالدى. قازىرگى تاڭدا كلينينگ كومپانيالارىنا قۇرامدى قۇراستىرۋ پۋنكتتەرىندە، جول بويىندا جانە اينالۋ پۋنكتتەرىندە جۇرگىزىلەتىن ۆاگونداردى جانە سانيتاريالىق توراپتاردى (اجەتحانالاردى) جۋىپ، جيناۋ ساپاسىنا قاتاڭ تالاپتار قويىلۋدا.
ۆاگونداردى جۋىپ، جيناۋ جيىلىگى ۇلعايتىلدى (تاۋلىگىنە 3 رەت جانە قاجەتتىلىگىنە قاراي، سانيتارلىق توراپتار تاۋلىگىنە 12 رەت جانە قاجەتتىلىگىنە قاراي جۋىپ، جينالادى)، مىندەتتى تۇردە ۆاگوننىڭ سانيتارلىق جاعدايىن تەكسەرۋ تۋرالى چەك-پاراق تولتىرىلادى جانە ت.ب.
ءوز باسىم تازالىققا كەلگەندە اسا كىرپياز اداممىن. ىشكى تازالىق جۇمىستارى جاسالعاننان كەيىن، مەن ۇنەمى قولىما اق ورامال الىپ تەكسەرىپ شىعامىن.
– كىر جۇعا ما، الدە ورامالىڭىز ءاپپاق بولىپ تۇرا ما؟
– وكىنىشكە قاراي، قازىرشە اق ورامالىم قاپ-قارا بولىپ شىعىپ جاتىر. ءبىراق ۋاقىت وتە كەلە ورامالىما شاڭ جۇقپايتىنداي تازا بولاتىنىنا سەنەمىن.
ءبىز ىشكى تازالىق جۇمىستارىنا بۋ-گەنەراتورىن قولدانامىز.
ۆاگون ءىشىن تازالاۋ كەزىندە بۋ گەنەراتورلارى قولدانىلادى، ولار قول جەتپەيتىن جەرلەردەگى شاڭ-توزاڭدى جۋىپ قانا قويماي، سونىمەن قاتار قوسىمشا زارارسىزداندىرۋعا مۇمكىندىك بەرەدى.
– بۇل قىزمەتكە قاشان كەلدىڭىز؟
– سول شىلدە ايىندا كەلدىم عوي. كەلە سالا جۇمىستى تازالىقتان باستاپ كەتتىم. ءبىراق ءقازىر ايتقانىمداي، اق ورامالىما كىر جۇعىپ ءجۇر.
– جولاۋشىلارمەن ءجيى سويلەسەدى ەكەنسىز...
– ءيا، بۇل راس. جولاۋشىلار اراسىندا ساۋالناما وتكىزۋدى ادەتكە اينالدىردىق. تۇتىنۋشىلاردىڭ پىكىرىن ءبىلۋ وتە ماڭىزدى.
ءبىز دە كليەنتتەردىڭ پىكىرىنە قۇلاق تۇرەتىن، ەل پىكىرىن ەستيتىن كومپانياعا اينالۋدى كوزدەيمىز. جولاۋشىلارمەن ونلاين كونفەرەنسيا وتكىزۋدى داستۇرگە اينالدىرماقپىز.
كليەنتتەر نەنى قالايدى؟ ولاردىڭ تالاپ-ۇدەسىنەن شىعۋ ءۇشىن نە ىستەي الامىز؟ كەمشىلىگىمىزدى كورە بىلەتىن كليەنتتەر ءبىزدىڭ جۇمىستى جەتىلدىرە تۇسەدى.
باتىستا مۇنى design thinking جۇيەسى دەپ اتايدى.
جولاۋشىلارمەن جۇزدەسۋ، ۆوركشوپ، سەمينارلار وتكىزۋ – باستى ماقسات. سونىڭ ناتيجەسىندە كليەنتتەرىمىز «پويىزداعى ساياحاتتى تاڭدايمىن» دەيتىن دەڭگەيگە جەتكىمىز كەلەدى.
ءار جۇما كۇنى قىزمەت كورسەتۋ بويىنشا مالىمەتتەر جينايمىز. قازىرگى ستاتيستيكالىق دەرەكتەرىمىز ەۋروپادان جوعارى بولىپ تۇر. ەۋروپا تالابى بويىنشا، جولاۋشىلاردىڭ شاعىمى 3 پايىزعا تەڭ. تالاپ كورپە-جاستىقتاردىڭ، جامىلعىلاردىڭ تازالىعى مەن ۇتىكتەلۋىنە قويىلادى. ال بىزدە بۇل تالاپ بويىنشا جولاۋشىلاردان تۇسكەن شاعىم 0،5 پايىز. سالىستىرمالى تۇردە بىزدەگى تەمىرجول قىزمەتىنىڭ كەمشىلىكتەرى ەۋروپاداعىدان 6 ەسە از دەگەن ءسوز.
– سەرۆيس ساپاسىن جاقسارتۋ ءۇشىن بۇل جەتكىلىكءتى مە؟ ءبىز بىلسەك، باتىستا ەكولوگيا ماسەلەسىنە ەرەكشە نازار اۋدارادى.
– البەتتە، ەكولوگيا ماسەلەسىن ۇمىت قالدىرمايمىز. قورشاعان ورتاعا قۇرمەتپەن قاراۋ ءوزىن-وزى سىيلايتىن كومپانيانىڭ نەگىزگى قۇندىلىعى عوي. بۇل باعىتتا جۇمىستى ساپالاندىرا، جەتىلدىرە تۇسپەكپىز. جاڭا ۆاگوندار بارلىق ەكولوگيالىق تالاپقا ساي بولادى. ەكولوگيا باعىتىنداعى نەگىزگى وزگەرىستىڭ ءبىرى – 2021 جىلدان باستاپ ۆاگونداردا قوقىستى سۇرىپتاۋ جۇيەسىن ىسكە قوسۋ.
ايتپاقشى، ءسىزدىڭ الەۋمەتتىك جەلىدەگى پوستىڭىز شىققاننان كەيىن قىزىلورداعا بارىپ كەلدىم (قىزىلوردا – سەمەي باعىتى، رەد.).
– مەنىڭ سىنىم قيسىنسىز ايتىلماعان شىعار؟
– قيسىنسىز ەمەس. ءسىز وتىرعان پويىزدى، ورىندىقتى تەكسەردىك. ءسىز دۇرىس ماسەلە كوتەرگەنسىز. ەڭ ناشار ورىندىققا وتىرىپسىز (كۇلدى).
جانىندا اجەتحانا بار ەكەن. جولاۋشىلار دارەتحاناعا بارعان سايىن ەسىك اشىلىپ-جابىلىپ، سىرتتان سۋىق اڭىراپ تۇرادى ەكەن. ەسىكتى تەكسەرىپ كوردىم. ءسىز جازعانداي، ەسىك دۇرىس اشىلىپ-جابىلمايدى.
سول پويىزعا مىنگەنىڭىز، سىن جازعانىڭىز، ەسكەرتۋ جاساعانىڭىز وتە دۇرىس بولدى. شەشۋدىڭ امالىن قاراستىرىپ جاتىرمىز. سول سوڭعى ۆاگوندا ەلەكتر جۇيەسى دە ناشار. سوندىقتان جىلىتۋ ماسەلەسى قيىندىق تۋدىرۋدا. ءقازىر سونى تۇزەتۋدىڭ تەحنيكالىق جولدارىن قاراستىرۋدامىز.
– ءسىز كەلگەلى ۋاقىتتا كومپانيا ماماندارىنا قويىلار تالاپ قانشالىقتى كۇشەيدى؟
– سەرۆيس ساپاسىن ارتتىرۋ ءبىز ءۇشىن جولسەرىكتەر جانە كاسسا قىزمەتكەرلەرىنىڭ كاسىبي بىلىكتىلىگىن كوتەرۋدى بىلدىرەدى. سەبەبى بۇلار ءبىزدىڭ كومپانيانىڭ بەت-بەدەرى، ايناسى ىسپەتتەس.
جولسەرىكتەر مەن كاسسا قىزمەتكەرلەرىنىڭ كاسىبي بىلىكتىلىگىن كوتەرۋ، وسى سالاداعى ساۋاتىن ارتتىرۋ ماقساتىندا اۋقىمدى ترەنينگتەر وتكىزۋدى جوسپارلاپ وتىرمىز.
سونىمەن قاتار ءوز قىزمەتىندە ۇزدىك كورسەتكىشكە قول جەتكىزگەن ماماندارعا ارناپ بونۋس جۇيەسىن، ياعني سىياقى سيستەماسىن ىسكە قوسپاقپىز.
ىلگەرىدە ايتقانداي، بيىل ءبىز قتج جولاۋشىلارىنىڭ پىكىرىن ءبىلىپ، ءبىزدىڭ قىزمەتتى ۇدايى پايدالاناتىن ازاماتتار اراسىندا ساۋالناما جۇرگىزدىك. ساۋالناما ناتيجەسىندە ايتىلعان حالىقتىڭ ۇسىنىس-پىكىرىن مىندەتتى ەسكەرىپ جاتىرمىز.
– پاندەميا كەزىندە ءبىراز كومپانيا كادرلىق قىسقارتۋ جۇرگىزدى. سىزدەر بۇل ماسەلەنى قالاي شەشتىڭىزدەر؟
– كومپانيادا تەر توگەتىن قىزمەتكەرلەر ءبىزدىڭ ارقاسۇيەر كۇش. بىلىكتى كادرلاردى ساقتاپ قالۋ ءۇشىن جالاقىنى تۇراقتى تۇردە ءوسىرىپ وتىرمىز. ىندەتكە قاراماستان بىردە-بىر جۇمىسشىنى قىسقارتقان جوقپىز!
كارانتين كەزىندە ۇيدە وتىرىپ قالعان قىزمەتكەرلەرگە ايلىعىنىڭ 50 پايىزىن ۇزبەي تولەپ تۇردىق.
كەلەسى جىلى جالاقىنى 5 پايىزعا كوتەرەمىز. كۇنى كەشە جولسەرىكتەرگە ارنالعان سىياقى جۇيەسىن ىسكە قوستىق. بۇعان 700 ملن تەڭگە بولىنەدى. بۇل – سەرۆيس ساپاسىن كوتەرۋگە باعىتتالعان ستراتەگيامىزدىڭ ماڭىزدى تارماعى ءارى جولسەرىكتەر ءۇشىن قوسىمشا ستيمۋل.
– «ءسىز كەلگەلى الىپساتارلاردىڭ بيزنەسى كەيىن كەتىپ، بيلەت ساتۋعا كەلگەندە ءتارتىپ پايدا بولدى» دەيدى. وسى راس پا؟
– تۇتاستاي العاندا، ءقازىر بيلەت ساتىپ الۋدىڭ جولى جەڭىلدەدى. ءسىز ايتىپ وتىرعان الىپساتارلاردىڭ سانى بيلەت ساتۋدىڭ ونلاين جۇيەسىن ناقتى قولعا العالى كۇرت ازايدى. بۇل دا جولاۋشىلاردىڭ جاعدايىن ويلاعاندىقتان قولعا الىنعان شارا. ساتىلىمدا بوس ورىندار بولماعان جاعدايدا، جولاۋشىلار جۇيەگە تىركەلىپ، كەزەككە تۇرۋ تارتىبىمەن بيلەت ساتىپ الۋعا مۇمكىندىك بەرەتىن ەلەكتروندى «كۇتۋ پاراعى» فۋنكسياسى ىسكە قوسىلدى. بۇل قىزمەتتى، ءقازىردىڭ وزىندە 319 مىڭنان استام ادام پايدالانعان.
بيىلعى جىلى «BILET.RAILWAYS.KZ» سايتى «Kaspi بانكى» پروسەسسينگىمەن تولىقتىرىلىپ، مۇمكىندىگى شەكتەۋلى ازاماتتاردىڭ بيلەتتى جەڭىلدىكپەن ونلاين راسىمدەۋىنە مۇمكىندىك پايدا بولدى.
سونىمەن قاتار پايدالانۋشىلاردى «قتج بيلەتى» ءموبيلدى قوسىمشاسىنداعى ساۋساق ءىزى – Touch ID جانە Pin-كود ارقىلى سايكەستەندىرۋ فۋنكسياسى ىسكە قوسىلدى. بالاما رەتىندە، تەمىرجول بيلەتىن بيلەت ساتاتىن ينتەرنەت-رەسۋرستار جانە تۇرعىن ءۇي كەشەنى، سۋپەرماركەت، كەڭسە عيماراتتارىندا جانە ت.ب. ورنالاسقان 30 مىڭعا جۋىق وزىنە-وزى قىزمەت كورسەتۋ اۆتوماتتارى ارقىلى ونلاين رەجيمىندە رەسىمدەۋگە بولادى.
بيلەتتى ونلاين ساتىپ الۋ كورسەتكىشى كۇن سايىن ءوسىپ كەلەدى. ءقازىر بۇل كورسەتكىش جالپى بيلەت ساۋداسىنىڭ 50 پايىزىن قۇرايدى.
ءازىر پويىزدارعا QR كود ورناتۋدامىز. جولاۋشىلار وسى ارقىلى سەرۆيس ساپاسىن ارتتىرۋعا قاتىستى ءوز ءوتىنىشىن قالدىرا الادى.
– پيتەر مىرزا، ءسىز وزىڭىزبەن بىرگە كومانداڭىزدى الىپ كەلدىڭىز بە؟ بىزدە سونداي «ءداستۇر» بار...
– نەمىس مامانعا كوماندا ەرتىپ ءجۇرۋ جاراسپايدى. بىزدە ونداي «ءداستۇر» جوق. مەنىڭ ادامدارمەن جۇمىس ىستەۋىم وتە جەڭىل. تەز ءتىل تابىسامىن...
كەلەر جىلدان باستاپ تەمىرجول قىزمەتكەرلەرىن ارنايى وقىتا باستايمىز. «Six sigma» دەگەن حالىقارالىق ستاندارت بويىنشا مامانداردىڭ بىلىكتىلىگىن ارتتىرامىز دەپ جوسپارلاپ وتىرمىز.
الدىمەن 30 ادامدى وقىتىپ شىعارامىز. سولاي جىل سايىن مامانداردى دايىنداي بەرەمىز، تەمىرجول قىزمەتىنىڭ ساپاسىن وسىلاي ارتتىرۋعا بولادى.
الداعى جىلدىڭ ەكىنشى جارتىسىندا سەرۆيس ساپاسىن ارتتىرۋعا باعىتتالعان سەمينارلاردى مولىنان ۇيىمداستىرامىز. سالا ماماندارىنىڭ پىكىرىن تىڭداپ، بۇدان بىلاي ۇزدىكسىز جۇرگىزىلەتىن ساۋالناما ناتيجەسىنە قۇلاق اسامىز.
– ءسىزدى قازاقستانعا وتە جاۋاپتى جانە ۇلكەن قىزمەتكە شاقىرىپتى. قازاقشا ۇيرەنىپ جۇرگەن شىعارسىز؟
– مەن بۇل جاققا كەلگەندە ەڭ الدىمەن ورىسشا ۇيرەنسەم، سودان كەيىن قازاقشا ءتىل سىندىرسام دەگەن ەدىم. ءبىراق ورىسشا دا ۇيرەنە العان جوقپىن. ويتكەنى جاسىراتىنى جوق، اينالا بارلىعى ورىسشا سويلەيدى. قاراپايىم جولاۋشىلار مەنىڭ قازاقشا سويلەگەنىمدى قالايتىنىن سەزىپ ءجۇرمىن. ءسىزدىڭ ماعان سۇراق ەمەس، سالماقتى تالاپ قويىپ وتىرعانىڭىزدى ءتۇسىندىم.
اڭگىمەلەسكەن دۋمان بىقاي
