بۇرىن مۇناي وندىرۋدە ەرىكتى شەكتەۋلەرمەن كەلىسكەن، ءبىراق بەلگىلەنگەن كۆوتالاردان اسىپ كەتكەن وپەك + ەلدەرى 2026 جىلدىڭ شىلدەسىنە دەيىن تاۋلىگىنە ارتىق وندىرىلگەن 4،779 ملن باررەلدى وتەۋى كەرەك. ونىڭ باسىم بولىگى قازاقستانعا تيەسىلى بولىپ شىقتى: تاۋلىگىنە 2،63 ملن باررەل، دەپ حابارلايدى Dalanews.kz Kapital.kz سايتىنا سىلتەمە جاساپ.
ياعني، جۋىردا وپەك+ اياسىندا مۇناي ءوندىرىسى كولەمىن ارتتىرۋعا مۇمكىندىك بەرىلگەنىمەن، قازاقستان 2026 جىلدىڭ ماۋسىمىنا دەيىن ونى قىسقارتۋمەن بولادى. قىسقارتۋ كەزەڭى 2026 جىلدىڭ ماۋسىمىنا (قوسا ەسەپتەگەندە) دەيىن جالعاسادى.
قازاقستان ءۇشىن مۇناي ءوندىرىسى كولەمىن قىسقارتۋ كەستەسى كەلەسىدەي:
- 2026 جىلدىڭ قاڭتارى: -100 مىڭ ت/ب؛
- اقپان: -300 مىڭ ت/ب؛
- ناۋرىز: -450 مىڭ ت/ب؛
- ءساۋىر: -490 مىڭ ت/ب؛
- مامىر: -550 مىڭ ت/ب؛
- ماۋسىم: -650 مىڭ ت/ب.
2025 جىلدىڭ سوڭىنا دەيىن مۇناي ءوندىرىسى كولەمىن تومەندەۋ قالىپتى جاعدايدا جۇزەگە اسادى: اي سايىن تاۋلىگىنە 10 مىڭنان 35 مىڭ باررەلگە دەيىن.
باسقا ەلدەر:
- يراك- 1،4 ملن ت/ب (2026 جىلدىڭ ماۋسىمىنا دەيىن بىركەلكى).
- رەسەي - 311 مىڭ ت/ب (2025 جىلدىڭ سوڭىنا دەيىن).
- ءباا-309 مىڭ ت/ب (2026 جىلدىڭ ماۋسىمىنا دەيىن).
- ومان - 70 مىڭ ت/ب (2026 جىلدىڭ ناۋرىزىنا دەيىن).
- كۋۆەيت - 59 مىڭ ت/ب (2025 جىلدىڭ قىركۇيەك ايىنىڭ سوڭىنا دەيىن).
ساۋد ارابياسى مەن الجير مۇنايدى ارتىق وندىرمەي، كۆوتا تالاپتارىن قالتقىسىز ورىنداعان.
"Goldman Sachs مالىمەتتەرى بويىنشا، قازاقستان ۇزاق ۋاقىت بويى كۆوتالاردى بۇزىپ كەلدى، ياعني كەن ورىندارىنىڭ ىشكى ەرەكشەلىكتەرىن جانە قاباتتارداعى قىسىمدى ۇستاپ تۇرۋ قاجەتتىلىگىن العا تارتا وتىرىپ، مۇنايدى كەلىسىلگەن كولەمنەن كوبىرەك ءوندىردى. ەندى جاعداي، كەرىسىنشە سيپاتقا يە بولۋدا. قازاقستان ءوندىرىستى ۇلعايتۋ تۋرالى وپەك جوسپارىنا جۋىقتاي الماۋدا. جەلتوقسانعا قاراي تالاپ ەتىلەتىن تاۋلىگىنە 100 مىڭ باررەل ءوسىمنىڭ ورنىنا ەلىمىز 29 مىڭعا، ال ناۋرىز-شىلدە ايلارىندا 37 مىڭعا "قارا التىن" ءوندىرىسى كولەمىن قىسقارتادى. بۇل ەلدى ادەتتەگى قۇقىق بۇزۋشىدان پروبلەمالىق وندىرۋشىگە اينالدىرادى"، دەپ جازادى ەلدار شامسۋتدينوۆ جەلىدە.
بۇعان دەيىن قازاقستان دا مۇشەسى بولىپ تابىلاتىن وپەك + ەلدەرى كەلەسى ايدا نارىقتاعى ۇلەسىن ۇلعايتۋعا ۇمتىلا وتىرىپ، مۇناي ءوندىرىسى كولەمىن ارتتىرۋعا ءوزارا كەلىسكەنىن جازعانبىز. ونداعى ەسەپتەۋلەرگە سۇيەنە وتىرىپ، قازاقستان قازان ايىندا مۇناي ءوندىرىسى كولەمىن 1،556 ملن باررەلگە دەيىن ارتتىرۋعا مۇمكىندىگى بارى دا ايتىلىپ ەدى.
