تۇركىستان وبلىسىندا تۇرعىنداردى تازا اۋىز سۋمەن قامتۋ ماسەلەسى – ءوڭىر باسشىلىعىنىڭ كۇن تارتىبىندەگى باستى باسىمدىقتاردىڭ ءبىرى. ءوڭىردى اۋىز سۋمەن قامتاماسىز ەتۋ ماسەلەسى وبلىس اكىمى نۇرالحان كوشەروۆتىڭ ءجىتى باقىلاۋىندا. مەملەكەت باسشىسى قاسىم-جومارت توقايەۆتىڭ 2025 جىلدىڭ سوڭىنا دەيىن حالىقتى 100 پايىز تازا اۋىز سۋمەن قامتاماسىز ەتۋ جونىندەگى تاپسىرماسىنىڭ ورىندالۋ بارىسى قاتاڭ باقىلاۋدا.
رەسپۋبليكا كولەمىندە ەلدى مەكەندەردى اۋىز سۋمەن قامتاماسىز ەتۋ دەڭگەيى قالالار مەن اۋىلدىق ەلدى مەكەندەردىڭ قامتىلۋ پايىزى بويىنشا ەكى نەگىزگى كورسەتكىش ارقىلى باعالانادى. تۇركىستان وبلىسى بۇل باعىتتا بەلسەندى جۇمىس جۇرگىزىپ جاتقان وڭىرلەردىڭ قاتارىندا. وبلىستاعى قالالار نە 542 مىڭعا جۋىق تۇرعىن 100% اۋىز سۋمەن قامتىلعان. سونىمەن قاتار 756 اۋىلدىق ەلدى مەكەننىڭ 98،1%-ى ورتالىقتاندىرىلعان اۋىز سۋمەن قامتاماسىز ەتىلگەن. الايدا، اۋىز سۋ ساپاسى، جەتكىزىلۋ ۋاقىتى، ينفراقۇرىلىمنىڭ توزۋى جانە كەيبىر ەلدى مەكەندەردە سۋدىڭ مۇلدەم بولماۋى سەكىلدى شەشىلۋى ءتيىس وزەكتى ماسەلەلەر دە بار. وتپەلى كەزەڭدە التەرناتيۆتى سۋ جەتكىزۋ شارالارىن ۇيىمداستىرۋ مىندەتتەلدى.
وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ مالىمەتىنشە، شاردارادا ەسكى سۋ تازارتۋ جۇيەسىنىڭ توزۋى جاز مەزگىلىندە حالىققا تۇراقتى سۋ بەرۋگە كەدەرگى كەلتىرىپ وتىر. بۇل ماسەلەنى شەشۋ ءۇشىن جالپى قۇنى 16،9 ملرد. تەڭگە بولاتىن «شاردارا توپتىق سۋ قۇبىرى» جوباسى ىسكە اسىرىلۋدا.
سول سياقتى، سارىاعاش قالاسىندا دا حالىق سانىنىڭ ارتۋى، سونداي-اق جاز مەزگىلىندە اۋىز سۋدى مولشەردەن تىس تۇتىنۋ (كەيدە ءتىپتى اعىن سۋدىڭ ورنىنا پايدالانۋ) سالدارىنان، «قاپلانبەك» سۋ تازارتۋ ستانسياسىنىڭ قۋاتتىلىعى جەتكىلىكسىز بولىپ وتىر. وسى ماسەلەنى شەشۋ ماقساتىندا ر-1 كانالىنان ماگيسترالدى سۋ قۇبىرىنىڭ قۇرىلىسى جۇرگىزىلۋدە. بۇعان قوسا، سۋ تازارتۋ ستانسياسىنىڭ جوباسى جوسپارلانعان.
وبلىستا بيىل جالپى 66 سۋ نىسانىنىڭ قۇرىلىسى جۇرگىزىلۋدە. بۇل جوبالارعا بيۋدجەتتەن 45،8 ملرد تەڭگە بولىنگەن. وبلىس اكىمى بۇل قارجىلاردى ءتيىمدى ءارى دەر كەزىندە يگەرۋدى تاپسىردى. سونداي-اق بيىلعى باستى كورسەتكىش – 30 ەلدى مەكەندە سۋ جۇيەلەرىنىڭ قۇرىلىسىن تولىق اياقتاپ، اۋىز سۋعا قوسۋ. بۇل ءۇشىن بيۋدجەتتەن 19،7 ملرد تەڭگە ءبولىنىپ، مەردىگەرلەرمەن شارت جاسالعان.
اۋىز سۋدى كەستەمەن الاتىن اۋىلداردىڭ ماسەلەسى – ءجىتى نازاردا. جالپى، وبلىستا 756 اۋىلدىق ەلدى مەكەن سۋ قۇبىرىنا قوسىلعان بولسا، سونىڭ ىشىندە 192 ەلدى مەكەنگە اۋىز سۋ كەستەمەن بەرىلەدى. ونىڭ نەگىزگى سەبەپتەرى رەتىندە جەر استى سۋلارىنىڭ تومەندەۋى، سۋ تازارتۋ قوندىرعىلارىنىڭ قۋاتى جەتكىلىكسىزدىگى، ينفراقۇرىلىمنىڭ توزۋى، سۋدىڭ ۇنەمسىز پايدالانىلۋى اتالدى. مىسالى، ساۋران اۋدانى ورانعاي اۋىلىندا تارتىلعان سۋ جۇيەلەرى قاراۋسىز قالىپ، جابدىقتار ۇرلانعان.
