2023 جىلعى 1 ناۋرىزدان باستاپ قازاقستان رەسپۋبليكاسىندا جەكە تۇلعالاردىڭ بانكروتتىق ينستيتۋتى ىسكە قوسىلدى. وسى كەزەڭنەن باستاپ بۇگىنگە دەيىن بانكروتتىق ءراسىمىن قولدانۋعا 270 مىڭنان استام ءوتىنىش كەلىپ تۇسكەن، دەپ حابارلايدى Dalanews.kz.
"ونىڭ ىشىندە 262 مىڭ ءوتىنىش سوتتان تىس بانكروتتىق ءراسىمى اياسىندا بەرىلگەن. الايدا، 193 مىڭ ءوتىنىش (73%) بويىنشا كىرىس ولشەمشارتتارىنا سايكەس كەلمەۋ فاكتىلەرى انىقتالىپ، ناتيجەسىندە وتىنىشتەر قاناعاتتاندىرىلماعان. نەگىزگى سەبەپتەر — ءوتىنىش بەرۋشىنىڭ مەنشىگىندە مۇلىكتىڭ بولۋى، بەرەشەك سوماسى مەن تولەم جاسالماعان مەرزىمنىڭ تالاپتارعا سايكەس كەلمەۋى، سونداي-اق كرەديتورمەن بەرەشەكتى رەتتەۋ ءراسىمىنىڭ بولماۋى"، دەپ تۇسىندىرەدى مەملەكەتتىك كىرىستەر دەپارتامەنتى.
قۇزىرلى ۆەدمستۆو قولجەتىمدىلىكتى ارتتىرۋعا باعىتتالعان زاڭنامالىق وزگەرىستەر ەنگىزىلگەنىن ايتادى. ماسەلەن، سوتتان تىس بانكروتتىق ءراسىمىن جەڭىلدەتۋ ماقساتىندا 2024 جىلعى 19 ماۋسىمدا جانە 2025 جىلعى 30 ماۋسىمدا زاڭناماعا وزگەرىستەر ەنگىزىلدى.
ءبىرىنشى كەزەڭدەگى وزگەرىستەر:
- بەرەشەكتى رەتتەۋ تۋرالى قۇجاتتاردى قوسا بەرۋ تالابى الىنىپ تاستالدى؛
- كرەديتور مەن بەرەشەك سوماسى تۋرالى مالىمەتتەردى كورسەتۋ تالابى جويىلدى — بۇل اقپارات ەندى تىكەلەي كرەديتتىك بيۋرولاردان سۇراتىلادى؛
- سوتتان تىس بانكروتتىق راسىمىنە قاتىساتىن كرەديتورلاردىڭ تىزبەسى كەڭەيتىلدى.
2025 جىلعى 1 شىلدەدەگى ىسكە اسىرۋ ناتيجەلەرى
بۇعان دەيىن باس تارتىلعان ازاماتتاردىڭ اراسىنان 6 795 ادام سەبەپتەرىن جويعاننان كەيىن 3 اي وتكەن سوڭ ءوتىنىشتى قايتا تاپسىرىپ، بانكروت دەپ تانىلدى.
بۇگىنگى تاڭدا 34 600 ازامات رەسمي تۇردە بانكروت دەپ تانىلدى، ونىڭ ىشىندە:
- 2 031 ادام – اتاۋلى الەۋمەتتىك كومەك الۋشىلار،
- 10 451 ادام – 5 جىلدان استام مەرزىمدە قارىزدارىن وتەمەگەندەر.
سوت تارتىبىمەن بانكروتتىق جانە تولەم قابىلەتتىلىگىن قالپىنا كەلتىرۋ اياسىندا:
- كەلىپ تۇسكەن 10 000 ءوتىنىشتىڭ ىشىنەن 225 ازامات بانكروت دەپ تانىلدى؛
- 181 ازامات تولەم قابىلەتتىلىگىن قالپىنا كەلتىرۋ راسىمىنەن وتۋدە.
"زاڭ اياسىندا ءوز مۇمكىندىگىن پايدالانعان 34 مىڭنان استام ازامات شامادان تىس بەرەشەك جۇكتەمەسىنەن ارىلىپ، ەكونوميكالىق بەلسەندى ومىرگە قايتا ورالدى"، دەلىنگەن حابارلامادا.
ولاردىڭ ىشىندە:
- 1 248 ازامات جەكە كاسىپكەر رەتىندە تىركەلدى،
- 2024 جىلعا ارنالعان سالىق ەسەپتىلىگىنە سايكەس، ولاردىڭ جيىنتىق تابىسى 202،8 ملن تەڭگەنى، ەسەپتەلگەن سالىق سوماسى – 16 ملن تەڭگەنى قۇرادى.
بۇل دەرەكتەر جەكە كاسىپكەر رەتىندە تىركەلگەن ازاماتتاردى عانا قامتيدى.
