الماتى وبلىستىق سوتى قونايەۆ قالاسىنىڭ سوتى شىعارعان شەشىمدى جويىپ، قاپشاعاي سۋ قويماسى جاعاسىنداعى 150 گەكتار جەر تەلىمىن بۇرىنعىداي جەكەمەنشىك قولدا قالدىردى، دەپ حابارلايدى Dalanews.kz.
اتالعان جەر ۋچاسكەسى 18 جىل بۇرىن جەكەگە وتكەن. باستاپقىدا بۇل اۋماقتا زووپارك پەن تۇرعىن ءۇي كەشەنى سالىنۋى ءتيىس بولعان. كەيىن بۇل اۋماق بىرنەشە رەت ءبولىنىپ، ءارتۇرلى مەنشىك يەلەرىنە ءوتىپ كەتكەن.
Orda.kz مالىمەتىنشە، 2024 جىلعى 28 مامىردا قونايەۆ قالالىق سوتى جەر تەلىمىنە قاتىستى ساتىپ الۋ-ساتۋ جانە سىيعا تارتۋ كەلىسىمدەرىن جارامسىز دەپ تانىعان بولاتىن. الايدا بۇل شەشىمگە اپەللياسيالىق شاعىم دايىندالعان.
31 شىلدەدە الماتى وبلىستىق سوتىندا اپەللياسيالىق وتىرىس ءوتتى. جاۋاپكەرلەردىڭ ءبىرىنىڭ ايتۋىنشا، وبلىستىق سوت قالالىق سوتتىڭ شەشىمىن تولىعىمەن جويعان. سونداي-اق «وردا» دەرەككوزدەرىنىڭ حابارلاۋىنشا، سوت ءبىرىنشى ينستانسيادا پروسەستىك نورمالاردىڭ بۇزىلعانىن اتاپ كورسەتكەن.
ايتا كەتەيىك، وسى زووپارك سالىنۋى ءتيىس بولعان اۋماقتىڭ ءبىر بولىگىندە قازىرگى تاڭدا بالالار ورتالىعى ورنالاسقان. وندا باعاناشىلداعى بالالار ۇيىنەن تاربيەلەنۋشىلەردى كوشىرۋ جوسپارلانعان ەدى.
