قازاقستان بيلىگى ءباا بيلىگىنىڭ كومەگىمەن ارمان جۇماگەلدييەۆ باسقاراتىن ۇيىمداسقان قىلمىستىق توپتىڭ بەلسەندى مۇشەلەرىن استاناعا جەتكىزگەنى بەلگىلى بولدى، دەپ حابارلايدى Dalanews.kz Ulysmedia رەداكسياسىنا سىلتەمە جاساپ.

ۇيىمداسقان قىلمىستىق توپتىڭ اۋىر جانە اسا اۋىر قىلمىستاردى جاساعانى، ونىڭ ىشىندە قازاقستانداعى مەملەكەتتىك توڭكەرىسكە باعىتتالعان ءىس-قيمىلدارعا قاتىسۋعا قاتىسى بارى حابارلانادى. 

قىلمىستىق ۇيىمنىڭ ۇستالعان جانە جەتكىزىلگەن مۇشەلەرىنىڭ اراسىندا مىناداي ادامدار بار: 

ماقسات دۇيسەنوۆ، توپ باسشىسىنىڭ وڭ قولى، ۇيىمنىڭ كۇشتىك بلوگىنا جەتەكشىلىك ەتۋ، قۇقىق قورعاۋ ورگاندارىمەن ءوزارا ءىس-قيمىل جاساۋ، وزگە دە قىزمەتتى قامتاماسىز ەتۋگە جاۋاپتى بولعان؛

ءۋاليحان وسەربايەۆ، ۇيىمنىڭ كوشباسشىسىنا ەرەكشە جاقىن، دوستىق قىلمىستىق ۇيىمدارمەن، ءتۇرلى مەملەكەتتەردىڭ بيلىك قۇرىلىمدارىنىڭ وكىلدەرىمەن قارجى جانە بايلانىس ءۇشىن جاۋاپتى بولعان.

بۇعان دەيىن سوت ارمان جۇماگەلدييەۆتى قاڭتار وقيعالارى ءىسى بويىنشا 20 جىلعا سوتتاعان بولاتىن.

قىلمىستىق ءىس 2022 جىلعى قايعىلى وقيعالاردان كەيىنگى باستى ىستەردىڭ ءبىرى دەپ اتالدى. سوتتالۋشىلار ورىندىعىندا 40-تان استام ادام بولدى.