ەنەرگەتيكا ءمينيسترى الماسادام ساتقالييەۆ 2025 جىلعى 29 قاڭتاردا ماجىلىستە قازاقستاننىڭ رەسەيدەن نەگە ەلەكتر ەنەرگياسىن ساتىپ الاتىنىن ءتۇسىندىرىپ، ارادا جاسالىپ جاتقان جاڭا كەلىسىم قازاقستانداعى تاريفتەرگە ىقپال ەتۋ-ەتپەۋىنە قاتىستى تۋىنداعان سۇراققا دا جاۋاپ بەردى، جازادى Dalanews.kz.
ءماجىلىس دەپۋتاتى مۇقاش ەسكەندىروۆ قازاقستان مەن رەسەي اراسىنداعى ەكى ەلدىڭ ءبىرىڭعاي ەنەرگەتيكالىق جۇيەلەرىنىڭ پاراللەل جۇمىس ىستەۋىن قامتاماسىز ەتۋ جونىندەگى شارالار تۋرالى كەلىسىمدى راتيفيكاسيالاۋدى تالقىلاۋ بارىسىندا ەنەرگەتيكا مينيسترىنە بىرنەشە سۇراق قويدى.
"بىزگە مىنانى ايتىڭىزشى، قازاقستان رەسەيدەن قانشا كولەمدە جانە قانشا باعادا ەلەكتر ەنەرگياسىن ساتىپ الادى؟ جاڭا كەلىسىم قازاقستانداعى ەلەكتر ەنەرگياسى ءتاريفىنىڭ وسۋىنە اكەلىپ سوقپايدى ما"، - دەدى دەپۋتات.
بۇل رەتتە مينيستر الماسادام ساتقالييەۆ رەسەيدەن ەلەكتر ەنەرگياسى ەكى جاعدايدا ساتىپ الىناتىنىن اتاپ ءوتتى:
- تاپشىلىقتى جابۋ ءۇشىن؛
- جوسپاردان تىس توق اعىنى كەزىندە.
"جوسپاردان تىس توق اعىندارى ەلەكتر جۇيەسىنىڭ جۇمىسىندا اۋىتقۋلار بولعان جاعدايدا پايدا بولادى. بۇل جاعدايلار ءۇشىن ءارتۇرلى تولەم رەجيمدەرى قاراستىرىلعان. كەلىسىلگەن اۋىتقۋ دەڭگەيى 150 مەگاۆاتتان اسىرماساق، ءبىزدىڭ ەلىمىز ەلەكتر ەنەرگياسىنىڭ قۇنىن عانا تولەيدى. ەگەر اۋىتقۋ 150 مەگاۆاتتان اسسا، ديسپەچەرلەۋ جانە "روسسەتي"جەلىلەرى بويىنشا ترانزيتكە قوسىمشا اقى تولەنەدى. سونداي-اق، ەلەكتر ەنەرگياسىنىڭ تاپشىلىعىن جابۋ ءۇشىن نارىق سۋبەكتىلەرى جۇزەگە اسىراتىن جوسپارلى اعىندار بار. بۇل ارادا شارتتارعا بايلانىستى باعا ءارتۇرلى. ەگەر ءبىز رەسەيدەن ەلەكتر ەنەرگياسىن بەلگىلەنگەن دياپازوندا ساتىپ الساق، ونىڭ ساعاتىنا 1 كيلوۆاتىنىڭ ورتاشا قۇنى شامامەن 8 تەڭگەنى قۇرايدى. ەگەر ءبىز وسى دياپازوننان اسىپ كەتەتىن بولساق، وندا باعا 23،8 تەڭگەگە دەيىن وسەدى"، – دەپ ءتۇسىندىردى مينيستر.
ول جوسپارلى توق اعىندارى تاپشىلىق كەزەڭدەرىندە جۇرگىزىلەتىنىن ناقتىلادى.
"وزدەرىڭىز بىلەتىندەي، تۇتىنىس كولەمى ەڭ جوعارى ۋاقىتتاردا قازاقستاننىڭ ەنەرگوجۇيەسى كورشىلەس مەملەكەتتەردەن قىمبات ەلەكتر ەنەرگياسىن ساتىپ الۋعا ءماجبۇر. وتكەن جىلى ءبىز ءىشىنارا وزبەكستاننان، سونىمەن قاتار رەسەي فەدەراسياسىنان ساتىپ الدىق. رەسەيدىكى ساعاتىنا 1 كيلوۆاتىنىڭ قۇنى 48 تەڭگەنى قۇرادى. وسى جاعىنان العاندا، بۇل باعا وسىمىنە اكەلىپ سوقپايدى. نەلىكتەن؟ سەبەبى بۇل ءماجبۇرلى ساتىپ الۋ - باسقا الاتىن كوزدەر جوق. ايتپەسە، ىشكى تۇتىنۋشىلار ءۇشىن شەكتەۋلەر ەنگىزۋگە تۋرا كەلەر ەدى"، - دەدى ساتقالييەۆ.
وسىلايشا 2025 جىلعى 29 قاڭتاردا ءماجىلىس دەپۋتاتتارى رەسەيمەن ءبىرىڭعاي ەنەرگەتيكالىق جۇيەلەردىڭ جۇمىسىن قامتاماسىز ەتۋ جونىندەگى كەلىسىمدى راتيفيكاسيالاپ جىبەردى.
بۇعان دەيىن سايتىمىزدا "ۋاقىتتىڭ وزگەرۋىنە قاتىستى زاۋىت باسشىسى: جۇمىسشىلار شارشاپ قالىپ جاتىر، "براك" كوبەيدى" دەگەن ماقالا جاريالانعان بولاتىن.
