Energetika ministri Almasadam Sátqaliev 2025 jylǵy 29 qańtarda Májiliste Qazaqstannyń Reseiden nege elektr energiiasyn satyp alatynyn túsindirip, arada jasalyp jatqan jańa kelisim Qazaqstandaǵy tarifterge yqpal etý-etpeýine qatysty týyndaǵan suraqqa da jaýap berdi, jazady Dalanews.kz.
Májilis depýtaty Muqash Eskendirov Qazaqstan men Resei arasyndaǵy eki eldiń biryńǵai energetikalyq júieleriniń parallel jumys isteýin qamtamasyz etý jónindegi sharalar týraly kelisimdi ratifikatsiialaýdy talqylaý barysynda Energetika ministrine birneshe suraq qoidy.
"Bizge mynany aityńyzshy, Qazaqstan Reseiden qansha kólemde jáne qansha baǵada elektr energiiasyn satyp alady? Jańa kelisim Qazaqstandaǵy elektr energiiasy tarifiniń ósýine ákelip soqpaidy ma", - dedi depýtat.
Bul rette ministr Almasadam Sátqaliev Reseiden elektr energiiasy eki jaǵdaida satyp alynatynyn atap ótti:
- tapshylyqty jabý úshin;
- jospardan tys toq aǵyny kezinde.
"Jospardan tys toq aǵyndary elektr júiesiniń jumysynda aýytqýlar bolǵan jaǵdaida paida bolady. Bul jaǵdailar úshin ártúrli tólem rejimderi qarastyrylǵan. kelisilgen aýytqý deńgeii 150 megavattan asyrmasaq, bizdiń elimiz elektr energiiasynyń qunyn ǵana tóleidi. Eger aýytqý 150 megavattan assa, dispetcherleý jáne "Rosseti"jelileri boiynsha tranzitke qosymsha aqy tólenedi. Sondai-aq, elektr energiiasynyń tapshylyǵyn jabý úshin naryq sýbektileri júzege asyratyn josparly aǵyndar bar. Bul arada sharttarǵa bailanysty baǵa ártúrli. Eger biz Reseiden elektr energiiasyn belgilengen diapazonda satyp alsaq, onyń saǵatyna 1 kilovatynyń ortasha quny shamamen 8 teńgeni quraidy. Eger biz osy diapazonnan asyp ketetin bolsaq, onda baǵa 23,8 teńgege deiin ósedi", – dep túsindirdi ministr.
Ol josparly toq aǵyndary tapshylyq kezeńderinde júrgiziletinin naqtylady.
"Ózderińiz biletindei, tutynys kólemi eń joǵary ýaqyttarda Qazaqstannyń energojúiesi kórshiles memleketterden qymbat elektr energiiasyn satyp alýǵa májbúr. Ótken jyly biz ishinara Ózbekstannan, sonymen qatar Resei Federatsiiasynan satyp aldyq. Reseidiki saǵatyna 1 kilovatynyń quny 48 teńgeni qurady. Osy jaǵynan alǵanda, bul baǵa ósimine ákelip soqpaidy. Nelikten? Sebebi bul májbúrli satyp alý - basqa alatyn kózder joq. Áitpese, ishki tutynýshylar úshin shekteýler engizýge týra keler edi", - dedi Sátqaliev.
Osylaisha 2025 jylǵy 29 qańtarda Májilis depýtattary Reseimen biryńǵai energetikalyq júielerdiń jumysyn qamtamasyz etý jónindegi kelisimdi ratifikatsiialap jiberdi.
Buǵan deiin saitymyzda "Ýaqyttyń ózgerýine qatysty zaýyt basshysy: Jumysshylar sharshap qalyp jatyr, "brak" kóbeidi" degen maqala jariialanǵan bolatyn.
