Almaty oblysynda politsiia AQSh-ta turatyn belsendi Serikjan Biláshtiń ápkesi Bátiqa Biláshtiń úiinde tintý júrgizip, ózin Qonaev qalasyndaǵy politsiia basqarmasyna alyp ketken, dep habarlaidy dalanews.kz.
Bul týraly Azattyqqa onyń kúieýi Amantai Aǵidolla habarlaǵan. Onyń aitýynsha, oqiǵanyń naqty sebebi ázirge belgisiz.
"Ne úshin ustaǵanyn bilmeimiz. Qazir sol politsiiada júrmiz", – dedi ol juma kúni tańerteń.
Amantai Aǵidollanyń sózinshe, tintý kezinde politsiia qyzmetkerleri úiden istemei qalǵan uialy telefon men birneshe Quran kitabyn tárkilegen. Ol úige shamamen 20 shaqty adamnyń kelgenin, olardyń arasynda arnaiy jasaq ókilderi de bolǵanyn aitty.
"Politsiia qyzmetkerleri kameraǵa túsirip, úidi tintti. Bátiqany alyp ketti. Naqty qai ýaqytta ustaǵanyn bilmeimin. Shamamen tańǵy 6-7 shamasynda úiden alyp ketken siiaqty. Keiin politsiiaǵa aparyp, qaitadan úige keldi. Tintý júrgizdi. Saǵat 23:00-den asqanda Qonaevtaǵy politsiia departamentine alyp ketti", – dedi Amantai Aǵidolla.
Bátiqa Biláshtiń advokaty Shynqýat Baijanov politsiiaǵa bara jatqanyn, ázirge qolynda naqty málimet joq ekenin jetkizgen.
Almaty oblystyq politsiia departamentiniń baspasóz qyzmeti atalǵan aqparatty anyqtaitynyn málimdedi.
Bátiqa Bilásh – Shyńjańdaǵy qazaqtar men uiǵyrlarǵa qatysty qýǵyn-súrgin máselesin kóterip júrgen belsendi Serikjan Biláshtiń ápkesi. Onyń politsiiaǵa jetkizilýiniń aǵasynyń qoǵamdyq qyzmetine qatysy bar-joǵy ázirge belgisiz.
