تبيليسي سوتى گرۋزيانىڭ بۇرىنعى پرەزيدەنتى ميحايل سااكاشۆيليدى مەملەكەتتىك قاراجاتتى ىسىراپ ەتۋ ءىسى بويىنشا 9 جىلعا باس بوستاندىعىنان ايىردى، دەپ حابارلايدى Dalanews.kz.
سااكاشۆيليگە بۇل ايىپ 2014 جىلى تاعىلعان. ءىس قوعامدا “پيدجاكتار ءىسى” دەگەن اتپەن بەلگىلى. ايىپتاۋ تاراپىنىڭ مالىمەتىنشە، سااكاشۆيلي پرەزيدەنتتىك كەزىندە مەملەكەتتىك قاراجاتقا قىمبات پيدجاكتار مەن پالتو ساتىپ الىپ، ۇلىنىڭ وقۋ اقىسىن تولەپ، كوسمەتيكالىق پروسەدۋرالار جاساعان. وعان 9 ميلليون لاري (1،5 ميلليارد تەڭگە) بيۋدجەت قاراجاتىن ىسىراپ ەتتى دەگەن ايىپ تاعىلدى.
بۇل ىستە سااكاشۆيليمەن بىرگە گرۋزيانىڭ مەملەكەتتىك كۇزەت ارنايى قىزمەتىنىڭ بۇرىنعى باسشىسى تەمۋر دجاناشيا دا ايىپتالدى. ول 300 مىڭ لاري (52،7 ميلليون تەڭگە) ايىپپۇل تولەۋگە مىندەتتەلدى.
ميحايل سااكاشۆيلي گرۋزيانى 2004-2013 جىلدار ارالىعىندا ەكى مەرزىم قاتارىنان باسقاردى. 2013 جىلى پرەزيدەنتتىك وكىلەتتىگى اياقتالعان سوڭ، ەلدەن كەتتى. جاڭا بيلىك – “گرۋزين ارمانى” پارتياسى سااكاشۆيليگە قاتىستى ءتورت قىلمىستىق ءىس قوزعادى. سونىڭ ەكەۋى بويىنشا ول سىرتتاي 3 جانە 6 جىلعا سوتتالعان.
2021 جىلدىڭ قازانىندا سااكاشۆيلي ۋكراينادان گرۋزياعا جاسىرىن تۇردە ورالدى. ول كەزدە ساياساتكەر ۋكراينانىڭ پرەزيدەنتى ۆلاديمير زەلەنسكيي اكىمشىلىگىندە جۇمىس ىستەپ جۇرگەن. گرۋزياعا ورالعان سوڭ ونى قاماۋعا الىپ، شەكارانى زاڭسىز كەسىپ ءوتتى دەگەن جاڭا ايىپ تاقتى.
