Tbilisi soty Grýziianyń burynǵy prezidenti Mihail Saakashvilidi memlekettik qarajatty ysyrap etý isi boiynsha 9 jylǵa bas bostandyǵynan aiyrdy, dep habarlaidy Dalanews.kz.
Saakashvilige bul aiyp 2014 jyly taǵylǵan. Is qoǵamda “pidjaktar isi” degen atpen belgili. Aiyptaý tarapynyń málimetinshe, Saakashvili prezidenttik kezinde memlekettik qarajatqa qymbat pidjaktar men palto satyp alyp, ulynyń oqý aqysyn tólep, kosmetikalyq protsedýralar jasaǵan. Oǵan 9 million lari (1,5 milliard teńge) biýdjet qarajatyn ysyrap etti degen aiyp taǵyldy.
Bul iste Saakashvilimen birge Grýziianyń Memlekettik kúzet arnaiy qyzmetiniń burynǵy basshysy Temýr Djanashiia da aiyptaldy. Ol 300 myń lari (52,7 million teńge) aiyppul tóleýge mindetteldi.
Mihail Saakashvili Grýziiany 2004-2013 jyldar aralyǵynda eki merzim qatarynan basqardy. 2013 jyly prezidenttik ókilettigi aiaqtalǵan soń, elden ketti. Jańa bilik – “Grýzin armany” partiiasy Saakashvilige qatysty tórt qylmystyq is qozǵady. Sonyń ekeýi boiynsha ol syrttai 3 jáne 6 jylǵa sottalǵan.
2021 jyldyń qazanynda Saakashvili Ýkrainadan Grýziiaǵa jasyryn túrde oraldy. Ol kezde saiasatker Ýkrainanyń prezidenti Vladimir Zelenskii ákimshiliginde jumys istep júrgen. Grýziiaǵa oralǵan soń ony qamaýǵa alyp, shekarany zańsyz kesip ótti degen jańa aiyp taqty.
