الماتىدا رەسپۋبليكالىق «تازا قازاقستان» باعدارلاماسى مەن قالالىق «الماتى – ورتاق ءۇيىمىز» باستاماسى اياسىندا جىلجىمالى ەكوحاب ۇيىمداستىرىلدى. قالا تۇرعىندارى پلاستيكتى قايتا وڭدەۋ ۇدەرىسىمەن تانىسىپ، ەكولوگيالىق جاۋاپكەرشىلىك تۋرالى كوبىرەك ماعلۇمات الدى جانە پلاستيكالىق بۇيىمداردى فاندوماتقا وتكىزىپ، اقشالاي سىياقى الۋ مۇمكىندىگىن سىناپ كوردى،- دەپ حابارلايدى Dalanews.kz

ءىس-شارا پانفيلوۆ كوشەسىندە ءوتتى. ءدال وسى جەردە ءبىر جىل بۇرىن قالا اكىمدىگىنىڭ جوبالىق كەڭسەسىنىڭ قولداۋىمەن قازاقستانداعى العاشقى فاندومات ورناتىلعان بولاتىن. سودان بەرى بۇل ورىن ەكولوگيالىق باستامالاردىڭ سيمۆولدىق نۇكتەسىنە اينالدى.

Eco Network جوباسىنىڭ نەگىزىن قالاۋشى ەۆگەنيي مۇحامەدجانوۆ مۇنداي باستامالار قالا تۇرعىندارىنا ەكولوگيالىق ادەتتەردى سىڭىرۋگە كومەكتەسەتىنىن اتاپ ءوتتى.

"فاندوماتتار – بۇل پلاستيك قالدىقتارىنان قۇتىلۋدىڭ ىڭعايلى ءادىسى عانا ەمەس، سونىمەن قاتار قورشاعان ورتاعا سانالى كوزقاراستى قالىپتاستىرۋدىڭ قۇرالى. ءبىز ادامداردىڭ قاراپايىم ارەكەتى دە ەكولوگيانى جاقسارتۋعا ۇلەس قوسا الاتىنىن تۇسىنگەنىن قالايمىز. قالدىقتاردى قايتا وڭدەۋ ءبىر رەتتىك ەمەس، كۇندەلىكتى ءومىردىڭ ءبىر بولىگىنە اينالۋى ءتيىس. الماتى ەكولوگيالىق بولاشاققا قاراي قادام جاساپ كەلەدى جانە بۇل تەك باستاماسى!"، – دەدى ول.

ءىس-شارا قوناقتارىنىڭ اراسىندا 5-سىنىپ وقۋشىسى ءىلياس احمەتوۆ تە بولدى.

"ەگەر ءار اۋلادا وسىنداي اپپاراتتار ورناتىلسا، ەشكىم پلاستيك بوتەلكەلەردى جاي عانا قوقىسقا تاستاماس ەدى. ەكولوگيا تۋرالى بۇرىن ويلانباعان دوستارىمنىڭ ءوزى قىزىعا باستادى. ءبىز مەكتەپتەن كەيىن پلاستيك جيناپ، ونى وتكىزىپ تۇرۋعا كەلىستىك"، - دەيدى ول.