جۇمىسشى ماماندار ەل ەكونوميكاسىنىڭ دامۋىنا، ءوندىرىس پەن قىزمەت كورسەتۋ سالالارىنىڭ ءتيىمدى جۇمىس ىستەۋىنە ايتارلىقتاي اسەر ەتەدى. سوندىقتان وسىناۋ كاسىپ يەلەرىن دارىپتەۋ جانە سۇرانىستى ارتتىرۋ ماقساتىندا بيىل ەلىمىزدە جۇمىسشى ماماندىقتارى جىلى دەپ جاريالاندى.
وكىنىشكە قاراي، اۋىل شارۋاشىلىعى قۇرىلىمدارىندا كادر تاپشىلىعى بار، مەكتەپ تۇلەكتەرى تاراپىنان بەلسەندىلىك از.
دەگەنمەن، ۆەتەريناريالىق تەحنولوگ ماماندىعىن تاڭداپ، نەسىبەسىن اۋىلشارۋاشىلىعى سالاسىنان تاۋىپ جۇرگەن جاستار دا جوق ەمەس. سولاردىڭ ءبىرى — مال شارۋاشىلىعىنىڭ جاي-جاپسارىن جاقسى بىلەتىن جاس مامان دانيار ابيتايەۆ.
ول بۇگىندە وسكەمەننىڭ ىرگەسىندەگى گلۋبوكوە اۋدانىنداعى ءسۇت ونىمدەرىن وندىرۋگە، مال جانە ەگىن شارۋاشىلىعىنا ماماندانعان «مايلى داقىلداردىڭ تاجىريبەلىك شارۋاشىلىعى» ج ش س ديرەكتورىنىڭ ورىنباسارى بولىپ ەڭبەك ەتەدى. اۋىلشارۋاشىلىعى سالاسىندا جۇمىس ىستەگەنىنە ون جىلدان استى.
«مايلى داقىلداردىڭ تاجىريبەلىك شارۋاشىلىعى» ج ش س كۇنباعىس ءدانىن وسىرىپ-وندىرەتىن شارۋاشىلىق ءارى تاڭداۋلى تۇقىم شارۋاشىلىعى مارتەبەسىنە يە. كاسىپورىن مايلى داقىلداردى سۇرىپتاۋمەن جانە تۇقىم وسىرۋمەن، ءمۇيىزدى ءىرى قارا مالدىڭ اسىل تۇقىمدى تۇرلەرىن وسىرۋمەن، اۋىل شارۋاشىلىعى ءونىمىن وندىرۋمەن، ساتۋمەن، قايتا وڭدەۋمەن، عىلىمي زەرتتەۋ جۇمىستارىنىڭ ناتيجەلەرىن اپروباسيالاۋمەن جانە اياقتالعان عىلىمي ازىرلەمەلەردى وندىرىسكە ەنگىزۋمەن اينالىسادى.
بۇگىندە اتالعان ءسۇت-تاۋار فەرماسىندا 650 باس سيىر بار. وندا ساۋىن زالى مەن ءسۇت قابىلدايتىن سەح جۇمىس ىستەيدى. جىلىنا 14 مىڭ توننا ءسۇت وندىرىلەدى. قۇرال-جابدىقتاردىڭ بارلىعى اۆتوماتتاندىرىلعان.
«الەمنىڭ 20-دان استام ەلىندە بولدىم. ءبىراق، ءبىزدىڭ ەلدە مەملەكەت تاراپىنان اۋىلشارۋاشىلىعى سالاسىنا كۇشتى قولداۋ كورسەتىلەدى. ماسەلەن، جوبالاردى ىسكە اسىرۋعا، سۋبسيديا تولەۋگە، جانار-جاعارماي جاعىنان، جەڭىلدەتىلگەن نەسيە تۇرىندە مەملەكەتتىك باعدارلامالار كوپ»،- دەدى جاس فەرمەر دانيار ابيتايەۆ.
ايتا كەتەيىك، اقش-تاعى سولتۇستىك داكوتا مەملەكەتتىك ۋنيۆەرسيتەتىندە ۆەتەريناريالىق تەحنولوگيا ماماندىعىن اياقتاعان جاس فەرمەر ءوزىنىڭ نەگىزگى قىزمەتىمەن قاتار الەۋمەتتىك جەلىدە جاستار ءۇشىن اۋىل شارۋاشىلىعى ءوندىرىسىنىڭ ماڭىزدىلىعىن جاريالاۋمەن اينالىسادى.
سونداي-اق، ەلىمىزدىڭ وزگە وڭىرلەرىندە ۆەتەريناريا، مال شارۋاشىلىعى جانە اگرونوميا ءبىلىم بەرۋ باعدارلامالارى بويىنشا وقىپ جۇرگەن جوعارى كۋرس ستۋدەنتتەرى مەن ماگيسترانتتارىنا «بولاشاقتىڭ اۋىل شارۋاشىلىعى» تاقىرىبىندا ءتۇرلى ترەنينگتەر وتكىزىپ جۇرگەن جاس مامان.
2020 جىلى سالاعا قوسقان ۇلەسى ءۇشىن اۋىل شارۋاشىلىعى مينيسترلىگىنىڭ مەدالىمەن ماراپاتتالعان.
ەلىمىزدە اۋىل شارۋاشىلىعى سالاسىنىڭ الەۋەتى زور. سوندىقتان بۇگىنگى جانە بولاشاقتىڭ اۋىلشارۋاشىلىعى وسىنداي ءبىلىمدى، ەڭبەكقور، جاڭاشىل جاس مامانداردىڭ قولىندا ەكەنى داۋسىز.
