Jumysshy mamandar el ekonomikasynyń damýyna, óndiris pen qyzmet kórsetý salalarynyń tiimdi jumys isteýine aitarlyqtai áser etedi. Sondyqtan osynaý kásip ielerin dáripteý jáne suranysty arttyrý maqsatynda biyl elimizde Jumysshy mamandyqtary jyly dep jariialandy.
Ókinishke qarai, aýyl sharýashylyǵy qurylymdarynda kadr tapshylyǵy bar, mektep túlekteri tarapynan belsendilik az.
Degenmen, veterinariialyq tehnolog mamandyǵyn tańdap, nesibesin aýylsharýashylyǵy salasynan taýyp júrgen jastar da joq emes. Solardyń biri — mal sharýashylyǵynyń jai-japsaryn jaqsy biletin jas maman Daniiar Abitaev.
Ol búginde Óskemenniń irgesindegi Glýbokoe aýdanyndaǵy sút ónimderin óndirýge, mal jáne egin sharýashylyǵyna mamandanǵan «Maily daqyldardyń tájiribelik sharýashylyǵy» JShS direktorynyń orynbasary bolyp eńbek etedi. Aýylsharýashylyǵy salasynda jumys istegenine on jyldan asty.
«Maily daqyldardyń tájiribelik sharýashylyǵy» JShS kúnbaǵys dánin ósirip-óndiretin sharýashylyq ári tańdaýly tuqym sharýashylyǵy mártebesine ie. Kásiporyn maily daqyldardy suryptaýmen jáne tuqym ósirýmen, múiizdi iri qara maldyń asyl tuqymdy túrlerin ósirýmen, aýyl sharýashylyǵy ónimin óndirýmen, satýmen, qaita óńdeýmen, ǵylymi zertteý jumystarynyń nátijelerin aprobatsiialaýmen jáne aiaqtalǵan ǵylymi ázirlemelerdi óndiriske engizýmen ainalysady.
Búginde atalǵan sút-taýar fermasynda 650 bas siyr bar. Onda saýyn zaly men sút qabyldaityn tseh jumys isteidi. Jylyna 14 myń tonna sút óndiriledi. Qural-jabdyqtardyń barlyǵy avtomattandyrylǵan.
«Álemniń 20-dan astam elinde boldym. Biraq, bizdiń elde memleket tarapynan aýylsharýashylyǵy salasyna kúshti qoldaý kórsetiledi. Máselen, jobalardy iske asyrýǵa, sýbsidiia tóleýge, janar-jaǵarmai jaǵynan, jeńildetilgen nesie túrinde memlekettik baǵdarlamalar kóp»,- dedi jas fermer Daniiar Abitaev.
Aita keteiik, AQSh-taǵy Soltústik Dakota memlekettik ýniversitetinde veterinariialyq tehnologiia mamandyǵyn aiaqtaǵan jas fermer óziniń negizgi qyzmetimen qatar áleýmettik jelide jastar úshin aýyl sharýashylyǵy óndirisiniń mańyzdylyǵyn jariialaýmen ainalysady.
Sondai-aq, elimizdiń ózge óńirlerinde veterinariia, mal sharýashylyǵy jáne agronomiia bilim berý baǵdarlamalary boiynsha oqyp júrgen joǵary kýrs stýdentteri men magistranttaryna «Bolashaqtyń aýyl sharýashylyǵy» taqyrybynda túrli treningter ótkizip júrgen jas maman.
2020 jyly salaǵa qosqan úlesi úshin Aýyl sharýashylyǵy ministrliginiń medalimen marapattalǵan.
Elimizde aýyl sharýashylyǵy salasynyń áleýeti zor. Sondyqtan búgingi jáne bolashaqtyń aýylsharýashylyǵy osyndai bilimdi, eńbekqor, jańashyl jas mamandardyń qolynda ekeni daýsyz.
