Qyrǵyzstan quqyq qorǵaý organdary belgili boksshy Dmıtrıı Bıvoldyń burynǵy jubaıy Ekaterına Bıvolǵa izdeý jarıalady, dep habarlaıdy Dalanews.kz agenttigi 24.kg-ge silteme jasap.

Bishkek qalasynyń ishki ister basqarmasy taratqan málimetke sáıkes, Ekaterına Bıvolǵa Qyrǵyz Respýblıkasynyń Qylmystyq kodeksiniń 330-baby boıynsha (“Násildik, etnıkalyq, ulttyq nemese óńirlik arazdyqty qozdyrý”) aıyp taǵylǵan. Tergeý organdary oǵan bultartpaý sharasy retinde qamaýǵa alý túrindegi jazany syrttaı bekitken.

Atalǵan baptyń sanksıasy boıynsha kináli dep tanylǵan adam bes jyldan jeti jylǵa deıin bas bostandyǵynan aıyrylýy múmkin.

Buǵan deıin Ekaterına Bıvol áleýmettik jelide túrli ult ókilderine baǵyttalǵan qorlaıtyn sózder aıtylǵan vıdeony jarıalaǵan bolatyn. Bul jazba qoǵamda úlken synǵa ushyrap, kóptegen qoldanýshylar onyń áreketin aıyptady.

Jeli qoldanýshylary áıeldiń sózi Qyrǵyzstandaǵy ultaralyq kelisim men ózara qurmet qaǵıdattaryna qaıshy ekenin atap ótti.