Eki sait syrttai bir-birinen esh aiyrmashylyǵy joqtai kórinýi múmkin: zamanaýi dizain, mobildi nusqa, birneshe minýtta tirkelý múmkindigi jáne úirenshikti tólem tásilderi. Alaida olardyń biri Qazaqstan Respýblikasynyń zańnamasy aiasynda jumys istese, ekinshisiniń el aýmaǵynda tiisti qyzmetterdi kórsetýge quqyǵy bolmaýy múmkin, dep habarlaidy dalanews.kz.
Búginde mundai resýrstardy syrtqy belgilerine qarap ajyratý barǵan saiyn qiyndap keledi. Sondyqtan basty suraq – «sait qanshalyqty senimdi kórinedi?» emes, «uiymdastyrýshynyń resmi mártebesin rastaýǵa bola ma?».
Neni bilý mańyzdy
Qazaqstanda elektrondyq kazino men internet-kazino qyzmetine, sondai-aq Qazaqstan Respýblikasynda litsenziiasy joq býkmekerlik keńseler men totalizatorlardyń internet-resýrstaryna tyiym salynǵan.
Litsenziattar týraly ózekti aqparat ýákiletti organnyń resmi internet-resýrsynda jariialanǵan.
Saittyń zańdy nemese zańsyz ekenin tek onda jariialanǵan aqparatqa qarap anyqtamaǵan jón. Logotipterdiń, shet memleketter bergen litsenziialardyń, oń pikirlerdiń, jarnamanyń nemese kerekti tilde qoldaý qyzmetiniń bolýy uiymdastyrýshynyń Qazaqstan aýmaǵynda jumys isteýge quqyǵy bar ekenin ózdiginen rastamaidy.
Nege nazar aýdarý kerek
Jii kezdesetin qatelikterdiń biri – internet-resýrsty syrtqy kórinisine qarap baǵalaý. Zańsyz platformada zamanaýi sait pen mobildi qosymsha, qoldaý qyzmeti, áleýmettik jelilerdegi paraqshalar jáne belsendi jarnama bolýy múmkin. Munyń bári resýrsty ilgeriletý tásilderine jatady, alaida onyń zańdy ekenin rastamaidy.
Býkmekerlik keńseler men totalizatorlardyń elektrondyq kassalary úshin zańnamada domendik ataýlarǵa qatysty talaptar belgilengen. Atap aitqanda, .KZ nemese .QAZ aimaqtaryndaǵy domendik ataýlar paidalanylady. Sonymen birge .KZ nemese .QAZ domeniniń bolýy resýrstyń zańdy ekenin avtomatty túrde bildirmeidi. Uiymdastyrýshyny, litsenziiasynyń bar-joǵyn jáne usynylǵan aqparattyń resmi memlekettik derekkózderdegi málimetterge sáikestigin tekserý qajet.
Memleket zańsyz resýrstardy qalai anyqtaidy
Qazirgi ýaqytta tsifrlyq monitoringti Oiyn biznesin monitoringteý jáne taldaý ortalyǵy júzege asyrady. Ortalyq kúmándi resýrstar týraly málimetterdi anyqtaidy, olardy tekseredi jáne qoljetimdilikti shekteý týraly sheshim qabyldaý úshin materialdardy belgilengen tártippen mass-media salasyndaǵy ýákiletti organǵa joldaidy.
Kúmán týdyratyn internet-resýrs anyqtalǵan jaǵdaida azamattar ol týraly Oiyn biznesin monitoringteý jáne taldaý ortalyǵynyń resmi paraqshasy arqyly da habarlai alady.
Habarlamada neni kórsetý kerek
Ótinish joldaǵan kezde myna aqparatty kórsetken jón:
internet-resýrstyń naqty mekenjaiy (URL);
saitta ne usynylatyny týraly qysqasha sipattama;
onyń qyzmetiniń zańdylyǵyna kúmán týdyrǵan belgiler;
múmkindik bolsa, sait betteriniń skrinshottary.
Habarlama úlgisi:
«[mekenjai] internet-resýrsyn tekserýdi suraimyn. Saitta onlain oiyndarǵa qatysý nemese bás tigý usynylady. Uiymdastyrýshynyń resmi mártebesin rastaý múmkin bolmady».
Habarlamalardy qabyldaýǵa arnalǵan jeke onlain-forma iske qosylýǵa daiyndalyp jatyr. Ol qoljetimdi bolǵanǵa deiin aqparatty Ortalyqtyń bailanys derekteri arqyly joldaýǵa bolady.
Azamattyń habarlama jiberýi internet-resýrstyń avtomatty túrde buǵattalatynyn bildirmeidi. Aldymen usynylǵan málimetter tekseriledi. Sodan keiin materialdar belgilengen tártippen ýákiletti memlekettik organdarǵa joldanady.
Eger saittyń zańdylyǵyna kúmándansańyz, tirkelmeńiz, shotyńyzdy toltyrmańyz jáne aldymen uiymdastyrýshynyń resmi mártebesin tekserińiz.
