Ózbekstannyń Samarqand oblysyndaǵy Kattaqorǵan aýdandyq qylmystyq ister soty 27 jastaǵy jergilikti turǵyn A.H.-ty «jaldamalylyq» jáne «shet memlekettiń qarýly qaqtyǵysyna qatysý» baptary boiynsha kináli dep tanyp, 3 jyl 1 aiǵa bas bostandyǵynan aiyrdy, dep habarlaidy dalanews.kz.
Jergilikti BAQ-tyń habarlaýynsha, ol Reseide ásker qataryna tartylyp, Ýkrainadaǵy soǵysqa qatysqan. Kun.uz basylymynyń sot qujattaryna silteme jasap jazýynsha, ózbekstandyq azamat 2023 jyly Reseige jumys izdep barǵan. Keiin ol esirtki saýdasyna qatysty aiyppen ustalyp, 12 jylǵa sottalǵan.
Sotta bergen jaýabynda er adam ózine taǵylǵan aiyptyń negizsiz ekenin málimdegen. Onyń aitýynsha, eki ai boiy qysym men azaptaýǵa ushyraǵannan keiin ǵana kinásin moiyndaýǵa májbúr bolǵan. Sondai-aq ol Resei túrmesinde otyrǵan kezde áskeri qyzmetke tartylyp, keiin Ýkrainadaǵy soǵysqa jiberilgenin aitqan.
Is materialdaryna sáikes, Ózbekstan zańnamasy óz azamattarynyń shetel memleketterdiń qarýly qaqtyǵystaryna qatysýyna tyiym salady. Osyǵan bailanysty sot ony jaldamalylyq jáne sheteldik qarýly qurylymdardyń quramynda soǵys qimyldaryna qatysý baptary boiynsha kináli dep tanyǵan.
