Qazaqstanda 2023 jyldyń qorytyndysyn talqylaǵan Úkimettiń keńeitilgen otyrysynda Premer-ministr Oljas Bektenov el ekonomikasynyń negizgi salalaryndaǵy jetistikter men kórsetkishter týraly baiandady, dep jazady Dalanews.kz.
Máselen, ótken jyly 29 iri zaýyt salynyp, aýyl sharýashylyǵy, kólik jáne turǵyn úi qurylysy salalarynda birqatar ilgerileý baiqalǵan.
Premer-ministrdiń málimetine súiensek, Qostanai oblysynda shoiyn quiý, Almaty oblysynda volfram men jylý oqshaýlaǵysh materialdar shyǵaratyn kásiporyndar iske qosylǵan. Sondai-aq Shymkent qalasynda baǵaly metaldardy óńdeý, Qaraǵandy oblysynda katodty mys, avtomobil shinalary men turmystyq tehnika shyǵaratyn zaýyttar boi kótergen.
“Saran qalasynda zamanaýi óndiristerdiń iske qosylýy onyń monoqala mártebesinen shyǵyp, jańa damý satysyna kóterilýine jol ashty”, – dedi Premer-ministr.
Byltyr 26 mln tonnadan astam astyq, 3 mln tonnadan astam maily daqyldar jinalyp, 4 mln tonna astyq eksportqa jóneltilgen. Bul týraly Bektenov:
“Eginshilerdi sýarmaly sýmen tolyq qamtýǵa basymdyq berildi. Aral teńizine 2,6 mlrd tekshe metr sý jiberildi, bul ortasha jyldyq kórsetkishten edáýir joǵary”, – dep atap ótti.
Sonymen qatar 80 sý arnasyn jańǵyrtý jumystary aiaqtalyp, sý únemdeý tehnologiialary qoldanylǵan egistik kólemi 1,5 esege (470 myń gektarǵa deiin) ulǵaidy.
19 mln sharshy metr turǵyn úi salynyp, densaýlyq saqtaý salasynda 397, bilim berý salasynda 298 nysan paidalanýǵa berildi. Stýdentterge arnalǵan 40 jataqhana (11 myń oryn) ashylǵan.
Júk tasymalynyń kólemi 10%-ǵa ósip, 1 mlrd tonnaǵa jetti. Transkaspii halyqaralyq kólik baǵyty boiynsha konteinerlik tasymal 2,7 ese artty.
Qurylys pen jóndeý jumystary 12 myń shaqyrym avtomobil jolyn jáne 2 800 shaqyrym temirjoldy qamtydy.
Almaty, Qyzylorda jáne Shymkent áýejailarynda jańa úsh terminal iske qosyldy. Buǵan qosa, Premer-ministr byltyr qosymsha 300 myńnan astam adam gaz jelisine qosylǵanyn, 200 myńnan astam turǵynnyń ortalyqtandyrylǵan sý júiesine qol jetkizgenin aitty.
Jalpy 542 shaqyrym jylý jelileri, 55 jylý kózi jańǵyrtylyp, 6,5 myń shaqyrym injenerlik jeli jóndeldi.
Jalpy 700 MVt-tan astam qosymsha elektr qýaty óndiriske qosyldy. Premer-ministrdiń aitýynsha, Investitsiialyq shtabta quny 50 mlrd dollar bolatyn 115 joba talqylanyp, olardyń problemalyq tustary tez arada sheshimin tapqan.
“Investitsiialyq shtab is múddesin nazarǵa alyp, biýrokratiialyq kedergilerge qaramastan, elge qajetti jobalardy der kezinde bastaýǵa múmkindik beretin sheshimder qabyldaýda”, – deidi Bektenov.
Onyń málimdeýinshe, qazirgi kezde 97 túzetý boiynsha zańnamalyq ózgerister ázirlenip jatyr. Olar iskerlik ahýaldy jaqsartý úshin naqty máselelerge tikelei baǵyttalady.
Sarapshylardyń pikirinshe, Qazaqstan ekonomikanyń túrli sektorlaryn damyta otyryp, infraqurylymdy nyǵaitýǵa den qoisa, aldaǵy ýaqytta óndiris pen eksporttaǵy jetistikterdi odan ári arttyra alady. Úkimet bul úrdisti jalǵastyrýǵa nietti ekenin kórsetti.
