ايتا كەتسەك، الداعى جۇمادا اقش پەن رەسەي فەدەراسياسى باسشىلارى تەلەفونمەن سويلەسىپ، ۋكرايناداعى اتىستى توقتاتۋ ماسەلەسىن تالقىلايتىنى جوسپارلانىپ وتىر. وسىنى نەگىزگە العان قازاقستان قارجىگەرلەرى قاۋىمداستىعى اپتا سوڭىنا قاراي تەڭگە مەن رەسەيلىك ءرۋبلدىڭ تاعى دا نىعايا تۇسەتىنىن بولجايدى، دەپ حابارلايدى Dalanews.kz.
وسى اپتادا سەيسەنبىدەگى قور بيرجاسىنداعى ساۋدا-ساتتىق قورىتىندىسى بويىنشا ۇلتتىق ۆاليۋتاعا شاققاندا 1 اقش دوللارىنىڭ قۇنى 5،82 تەڭگەگە تاعى ارزانداپ، 488،44 تەڭگەنى قۇرادى. ساۋدا-ساتتىقتىڭ جوعارى كولەمى (270،1 ملن دوللار) تىركەلدى.
"ۇلتتىق ۆاليۋتا باعامىنىڭ مۇنداي سيپاتى بازالىق مولشەرلەمەنىڭ جوعارىلاۋى، ۇلتتىق بانكتىڭ وپەراسيالارى جانە كۆازيمەملەكەتتىك سەكتور سۋبەكتىلەرى ساتۋى اياسىندا شەتەل ۆاليۋتاسىنىڭ تۇراقتى ۇسىنىسى، سونداي-اق جىلدىڭ ءبىرىنشى توقسانىندا ساۋدا بالانسىنىڭ ءپروفيسيتىنىڭ جاقسارۋىمەن ايقىندالۋى مۇمكىن. سىرتقى فاكتور تاراپىنان ءرۋبلدىڭ قاتتى نىعايۋى جانە ءبىر مەزگىلدە دوللار يندەكسىنە قاتىستى جۇرگىزىلىپ جاتقان تۇزەتۋلەر جەرگىلىكتى سەنتيمەنتكە جاعىمدى اسەر ەتۋى ىقتيمال. بۇل تۇرعىدا ۋكرايناداعى اسكەري قاقتىعىستى رەتتەۋگە قاراي جاسالعان العاشقى قادامدار الداعى كۇندەرى رۋبل مەن تەڭگەگە ايتارلىقتاي وڭ اسەر ەتۋى مۇمكىن ەكەنىن اتاپ وتەمىز. ايتا كەتسەك، دجيدداداعى كەلىسسوزدەردىڭ قورىتىندىسى بويىنشا ۋكراينا اقش-تىڭ اتىستى توقتاتۋدىڭ 30 كۇندىك رەجيمى تۋرالى ۇسىنىسىنا كەلىسكەن. بۇگىن امەريكالىق جانە رەسەيلىك ديپلوماتتار اراسىندا كەلىسسوزدەر بولادى دەپ كۇتىلۋدە، ال جۇمادا ۋكرايناداعى اتىستى دوعارۋ ماسەلەسىن اقش پەن رەسەي باسشىلارى تەلەفون ارقىلى تالقىلاماق"، دەلىنگەن قازاقستان قارجىگەرلەرى قاۋىمداستىعى حابارلاماسىندا.
بۇعان دەيىن سايتىمىزدا تەڭگەنىڭ رۋبلگە ەرۋىن دوعارعانىن جازعانبىز.
