ق ر ۇلتتىق بانك ءتوراعاسى تيمۋر سۇلەيمەنوۆ بۇگىن ارنايى وتكەن بريفينگ بارىسىندا بازالىق مولشەرلەمە كولەمىن وسىرۋلەرى مۇمكىن ەكەنىن ايتتى. ونى 16،5% دەڭگەيىندە ۇستاپ تۇرۋ وتە قيىن كورىنەدى، دەپ حابارلايدى Dalanews.kz.

بۇگىن ۇلتتىق بانكتىڭ اقشا-نەسيە ساياساتى جونىندەگى كوميتەتى بازالىق مولشەرلەمەنى 16،5% دەڭگەيىندە وزگەرىسسىز قالدىرۋ تۋرالى شەشىم قابىلدادى.

"ءبىزدىڭ بولجامدارىمىزعا كەلەتىن بولساق، بازالىق مولشەرلەمە كەم دەگەندە 2025 جىل بويىندا وسى دەڭگەيدە ساقتالۋى ءتيىس. بۇل بولجامدار مودەلدىك تاجىريبەگە سۇيەنىپ جاسالعانى، كوپتەگەن نارسە، سونىڭ ىشىندە ەلىمىزدىڭ ەكونوميكاسىنداعى، سول سەكىلدى سىرتقى ماكروەكونوميكالىق جاعداي دا الدا وزگەرەتىنى انىق. ءبىراق ازىرگە، بۇگىنگە دەيىنگى بولجامدارعا ساي بازالىق مولشەرلەمە 2025 جىل بارىسىندا وسىنداي دەڭگەيدە بولادى نەمەسە قاتاڭداتۋ تۇرعىسىندا قايتا قاراستىرىلۋى دا مۇمكىن دەپ بولجانۋدا"، – دەدى تيمۋر سۇلەيمەنوۆ.

ايتا كەتسەك، ۇلتتىق بانك 2025-2026 جىلدارعا ارنالعان ينفلياسيا بويىنشا بولجامدى ناشارلاتۋ تۇرعىسىندا قايتا قاراعان بولاتىن. وعان سايكەس، 2025 جىلى ينفلياسيا 10،5–12،5%، 2026 جىلى 9،5–11،5% دەڭگەيىندە بولادى دەپ كۇتىلەدى. 5،5–7،5%- عا دەيىن تومەندەۋ تەك 2027 جىلعا قاراي ورىن الۋى مۇمكىن ەكەنى ايتىلادى، وندا دا اقشا-نەسيە ساياساتىن تەجەۋ جانە بيۋدجەتتىك قولداۋدىڭ قىسقارۋى جاعدايىندا. بولجامدى قايتا قاراۋعا ازىق-تۇلىكتىڭ الەمدىك نارىقتاعى باعالارىنىڭ ءوسۋى، ىشكى سۇرانىستىڭ كۇشەيۋى، مۇناي باعاسىنىڭ تومەندەۋى جانە سىرتقى ينفلياسيانىڭ ءوسىمى تۇرتكى بولعانى ايتىلادى. قاۋىپ-قاتەر تاۋەكەلدەرى قاتارىنا ججم باعاسىنداعى بەلسەندىلىك، رەتتەلەتىن تاريفتەردىڭ ءوسىمى جانە سالىق ساياساتىنداعى وزگەرىستەر جاتقىزىلادى.