SpaceX جانە Tesla كومپانيالارىنىڭ نەگىزىن قالاۋشى، امەريكالىق ميللياردەر يلون ماسك اقش پرەزيدەنتى دونالد ترامپ "ەپشتەين فايلدارىندا" توبە كورسەتەتىنىن ايتتى. "بومبا جاراتىن كەز كەلدى" دەگەن جەلىدەگى ءوز جازباسىندا ماسك وسىنداي قۇپيانىڭ بەتىن اشتى. ترامپ تا قالىس قالماي، ميللياردەردىڭ ەلەكتر كولىگىن جاتا جامانداۋدا. وسىلايشا كەشە عانا سايلاۋ ناۋقانىندا اجىراماس ادال دوستارداي كورىنگەن اقش ساياساتىنداعى تۇلعالار كوپشىلىك الدىندا ءبىر-بىرىنىڭ بەتپەردەسىن اشۋعا تىرىسۋدا، دەپ حابارلايدى Dalanews.kz.
"ناعىز بومبانى جاراتىن كەز كەلدى. بۇل جايتتىڭ وسىعان دەيىن جاريالانباۋىنىڭ ناقتى سەبەبى وسى"، - دەپ جازعان ماسك ترامپقا "ءساتتى كۇن" تىلەدى.
سونىمەن قاتار، ول ءوز جازباسى استىنا تۇسىنىكتەمە قالدىرعاندار اراسىندا "ترامپقا يمپيچمەنت جاريالاۋ جانە ونىڭ ورنىنا قازىرگى اقش ۆيسە-پرەزيدەنتى ۆەنستى سايلاۋ تۋرالى" يدەيانى دا قولداي كەتتى.
ايتا كەتسەك، "ەپشتەين فايلدارى" دەگەن قارجىگەر دجەففري ەپشتەيننىڭ ءىس قۇجاتتارى. وعان العاش رەت 2006 جىلى ايىپ تاعىلدى. ول جەزوكشەلىكتى ۇيىمداستىرۋمەن اينالىسقانىن مويىنداپ، كامەلەتكە تولماعاندى زورلاعانى ءۇشىن سوتتالعان. ميللياردەر اقش-تا 2019 جىلدىڭ جازىندا قايتا ۇستالادى. ول كەزدە دە قىزدارمەن، ونىڭ ىشىندە 14 جاسار قىزداردى جەزوكشەلىككە يتەرمەلەۋ، ادام ساۋداسىمەن اينالىسۋ سىندى ايىپتار جاريالاندى. ەپشتەينگە 40 جىلعا دەيىن باس بوستاندىعىنان ايىرۋ جازاسى تونگەن. ول تەمىردىڭ توردىڭ ارعى جاعىندا قۇپيا جاعدايدا كوز جۇمعان.
بۇعان جاۋاپ رەتىندە ترامپ Truth Social-داعى پاراقشاسىندا ەشكىمگە قاجەتى جوق ەلەكتروموبيلدەردى ساتىپ الۋعا بارشانى ماجبۇرلەۋشى بۇيرىعىنىڭ كۇشىن جويعانىن ايتىپ، جازبا جاريالادى. ونىڭ ايتۋىنشا، ماسك "ابدەن بولدىرعان"، سوندىقتان دا ساياساتتان كەتۋگە ءوتىنىش بىلدىرگەن.
"ول مەنىڭ وسىلاي جاسايتىنىمدى بىرنەشە اي بويى الدىن الا ءبىلىپ ءجۇردى، سودان كەيىن دە جىندانىپ كەتتى!"- دەپ جازدى ترامپ.
رەسپۋبليكاشىل ساياساتكەردىڭ ايتۋىنشا، ەل بيۋدجەتىن ۇنەمدەۋدىڭ ەڭ وڭتايلى جولى – ۇكىمەتتىك سۋبسيديالاردى قىسقارتىپ، ماسكتىڭ كەلىسىمشارتتارىن جويۋ.
وسى جازبالاردان كەيىن ءبىر ءتۇن ىشىندە ماسكقا تيەسىلى Tesla اكسيالارىنىڭ باعاسى 15%-عا قۇلادى، بۇل سوڭعى ءۇش ايداعى ءىرى قۇلدىراۋ بولدى. ءسويتىپ اقش پرەزيدەنتىمەن سوزگە كەلەمىن دەپ ميللاردەر ءبىر كۇندە 34 ملرد دوللارىن جوعالتتى، ءبىراق ول ءالى دە الەمدەگى ەڭ باي ادامدار تىزىمىندە ءبىرىنشى ورىندا تۇر. بۇل تۋرالى 6 ماۋسىمدا Bloomberg اگەنتتىگى جازدى. اگەنتتىك مالىمەتىنشە، يلون ماسكتىڭ بايلىعى 334،5 ملرد دوللارعا باعالانادى. ول 2025 جىلدىڭ باسىنان باستاپ بۇگىنگە دەيىن 97،9 ملرد دوللارىن جوعالتىپتى.
نەگىزى، "داۋدىڭ باسى دايرابايدىڭ كوك سيىرى" دەمەكشى، ءبارى يلون ماسكتىڭ 2025 جىلدىڭ 3 ماۋسىمىندا ترامپ اكىمشىلىگى ۇسىنعان بيۋدجەت جوباسىن سىنعا الۋدان باستالدى. كاسىپكەر بۇل قۇجاتتى "ادام كورگىسىز جەكسۇرىن دۇنيە" دەپ اتادى. ويتكەنى، ونىڭ ايتۋىنشا، بۇل جوبا بيۋدجەت تاپشىلىعىن 2،5 ترلن دوللارعا دەيىن ەداۋىر ارتتىرىپ، امەريكا ازاماتتارى موينىنا ۇلكەن قارىز اۋىرتپالىعىن سالاتىن كورەدى.
"مەن وزىمە ۋايىمداپ تۇرعانىم جوق. ەلەكتروموبيل، كۇن ەنەرگياسىنا ارنالعان سۋبسيديالاردى قىسقارتسا قىسقارتا بەرسىن، الايدا مۇنايگاز سالاسىنا ەش تيىسپەگەن (ادىلەتسىزدىك قوي)، ءبىراق زاڭ جوباسىنان تاۋداي-تاۋداي جەكسۇرىن قورسىلداقتاردىڭ بارلىعىن سىزىپ تاستاڭىز (بۇل ارادا بيۋدجەت اقشاسىنا قول سالعان ات توبەلىندەي توپتى مەڭزەيتىن "شوشقا مايى تولى بوشكە" دەگەن يدەوما نەگىزگە الىنعان سەكىلدى، بىزشە ايتقاندا، تەگىن مايلى شەلپەك). ايتپەسە، مىناۋىڭىز ۇلكەن ءارى قورقىنىشتى زاڭ جوباسى بولادى"، دەپ اتاپ ءوتتى ميللياردەر.
ترامپ 2025 جىلدىڭ 5 ماۋسىمىندا كاسىپكەردىڭ قاتتى-قاتتى ايتقان سوزدەرىنەن كوڭىلى قالعانىن جەتكىزدى. ءسويتىپ ول ماسكتىڭ مۇنىمەن توقتامايتىنىن، ءالى تالاي ايىپتاۋلاردى وزىنە قارشا بوراتاتىنىن بولجاعان.
