بۇگىن تۇركىستان قالاسىنداعى «Olympic Center» سپورت كەشەنىندە بوكستان سيدنەي وليمپياداسىنىڭ جانە الەم چەمپيوناتىنىڭ كۇمىس جۇلدەگەرى، ازيا ويىندارىنىڭ چەمپيونى، ق ر بوكس فەدەراسياسىنىڭ ۆيسە-پرەزيدەنتى مۇحتارحان قوبىلانبەك ۇلى دىلدابەكوۆتىڭ جۇلدەسىنە ارنالعان جاستار اراسىنداعى XIII حالىقارالىق ءتۋرنيردىڭ سالتاناتتى اشىلۋ ءراسىمى ءوتتى.
شارادا تۇركىستان وبلىسى اكىمىنىڭ ورىنباسارى ەرتاي التايەۆ، قازاقستان بوكس فەدەراسياسىنىڭ پرەزيدەنتى شاحمۇرات ءمۇتالىپ جانە سيدنەي وليمپياداسىنىڭ چەمپيونى ەرماحان يبرايموۆ ءسوز سويلەپ، جارىسقا قاتىسۋشى جاس سپورتشىلارعا ساتتىلىك تىلەدى.
– تۇركى الەمىنىڭ التىن بەسىگى – قاسيەتتى تۇركىستان قالاسىنا قوش كەلدىڭىزدەر! ەل پرەزيدەنتى قاسىم-جومارت كەمەل ۇلىنىڭ بۇقارالىق سپورتتى دامىتۋ جونىندەگى باستامالارى وڭىردە ناقتى جۇزەگە اسۋدا. بۇگىنگى تۋرنير – سول باستامالاردىڭ جارقىن كورىنىسى. وبلىسىمىزدان وتە تالانتتى سپورتشىلار كوپ شىققان.
سولاردىڭ ءبىرى – سيدنەي وليمپياداسىنىڭ جانە الەم چەمپيوناتىنىڭ كۇمىس جۇلدەگەرى – مۇحتارحان قوبلانبەك ۇلى. بۇگىن ءبىز سايىپقىرانىمىزدىڭ جۇلدەسىنە ارنالعان جاستار اراسىنداعى XIII حالىقارالىق تۋرنيردە كەزدەسىپ وتىرمىز. ايتا كەتەيىك، بۇگىندە تۇركىستان وبلىسىندا 40 سپورت ۇيىمىندا 6000-عا جۋىق جاس بوكسشى شۇعىلدانۋدا. ايماقتا بوكس قارقىندى دامىپ جاتىر. قاتىسۋشىلارعا ءادىل، تازا ءارى تابىستى باسەكە تىلەيمىن! – دەدى ەرتاي التايەۆ.
بيىلعى تۋرنيرگە قازاقستاننىڭ بارلىق وڭىرلەرىنەن، سونداي-اق ازەربايجان، تاجىكستان، وزبەكستان جانە قىرعىزستاننان، ەلىمىزدىڭ بار وڭىرىنەن كەلگەن 20 كوماندا ساپىندا 140-تان استام جاس بوكسشى قاتىسۋدا. ولار 10 سالماق دارەجەسى بويىنشا ب ا ق سىناپ، مىقتىنى انىقتايدى.
جارىستىڭ باستى ماقساتى – تالانتتى جاستاردى ۇلتتىق قۇرامانىڭ ساپىنا ىرىكتەۋ جانە 1-13 تامىز كۇندەرى تايلاندتىڭ بانگكوك قالاسىندا وتەتىن ازيا چەمپيوناتىنا قاتىساتىن ۇزدىك سپورتشىلاردى ىزدەۋ. جاستار قۇراماسىنىڭ اعا جاتتىقتىرۋشىسى ماقسات باقتىبازاروۆتىڭ ايتۋىنشا، تۋرنير دەڭگەيى جوعارى، ال قاتىسۋشىلار ءوز دايىندىقتارىن تولىقتاي كورسەتۋدە.
✔️اۋقىمدى جارىستى تۇركىستان وبلىسىنىڭ اكىمدىگى، وبلىستىق دەنە شىنىقتىرۋ جانە سپورت باسقارماسى، سونداي-اق وبلىستىق №5 وليمپيادا رەزەرۆىنىڭ مامانداندىرىلعان بالالار مەن جاسوسپىرىمدەر سپورت مەكتەبى جوعارى دەڭگەيدە ۇيىمداستىردى.
