باستى ايىپتالۋشى ابزال شىناسىلدىڭ ادۆوكاتى سوت ۇكىمىمەن كەلىسپەي، اپەللياسياعا شاعىم تۇسىرەتىنىن مالىمدەدى، دەپ حابارلايدى Dalanews.kz.
ادۆوكات ابەنوۆتىڭ ايتۋىنشا، سوتتىڭ شىعارعان شەشىمى ادىلەتسىز جانە 23 جىلدىق جازا تىم اۋىر.
"بۇل شەشىممەن ەشكىم كەلىسپەيدى، حالىق تا بارلىعىن كورىپ-بىلىپ وتىر. ءبىز ايتارىمىزدى سوت بارىسىندا ايتتىق، ال قالعان دالەلدەرىمىزدى ەندى اپەللياسيادا ۇسىنامىز"، – دەدى ول.
سونىمەن قاتار ادۆوكات ءجاسوسپىرىمنىڭ ولىمىنە اكەسى قارجاۋبايدىڭ ءوزى سەبەپكەر بولۋى مۇمكىن ەكەنىن ايتىپ وتىر.
"پىشاقتى اكەسى قارجاۋبايدىڭ ءوزى پايدالانۋى مۇمكىن نەمەسە ءتۇسىرىپ العان پىشاعىن باسقا بىرەۋ كوتەرىپ الۋى دا عاجاپ ەمەس. ابزالدىڭ بۇل جەردە ەش جازىعى جوق. ول العاشقىدا شىندىقتى بىلمەگەندىكتەن كىنانى موينىنا الدى، ءبىراق كەيىن ءبارىن اشىپ ايتتى. الايدا سوت ونىڭ سوزىنە سەنبەدى. ءبىزدىڭ ەلدە ادامعا كىنانى ماجبۇرلەپ مويىنداتۋ قيىن شارۋا ەمەس"، – دەدى ابەنوۆ سوت زالىنان شىققان سوڭ جۋرناليستەرگە بەرگەن سۇحباتىندا.
بۇگىن تالعاردا كىسى قولىنان قازا تاپقان ءجاسوسپىرىم شەرزات پولاتتىڭ ءىسى بويىنشا سوت پروسەسى اياقتالدى.
